Votat e Listës Serbe ishin vendimtare për të kaluar Ligjin për Pagën Minimale
11 votat e deputetëve të Listës Serbe ishin vendimtare për të kaluar Ligji për Pagën Miminale sot në Kuvend.
Ky ligj u votua në parim me 68 vota për, asnjë kundërshtim dhe gjashtë abstenime, derisa në sallë ishin të pranishëm 74 deputetë.
Me gjashtë abstenimet e deputetëve të komuniteteve të tjera joshumicë dhe pa votat e deputetëve të Listës Serbe, Ligji për Pagën Minimale nuk do të kalonte.
Me këtë llogari do të ishin veç 57 vota për, derisa për kalimin e këtij ligji me shumicë të thjeshtë nevojiteshin 61 vota.
Momenti kur deputetët e Listës Serbe votojnë PËR
Por, një gjë të tillë po e mohon Armend Muja i Vetëvendosjes. Ai insiston se ky ligj do të kalonte edhe pa votat e deputetëve serbë.
Madje, ai po akuzon partitë opozitare po bëjnë ‘spin-a’ me votat e Listës Serbe.
“Paga Minimale: 74 deputetë kanë marrë pjesë në votim për pagën minimale, 68 vota ishin PËR. VV paraprakisht kishte siguruar kuorumin dhe votat për kalim të ligjit. Kur opozita e kanë parë që e kemi kuorumin edhe pa Listën Serbe, ata kanë qëndruar në sallë, pikërisht që t’ia japin një këso spin-i se kinse Lista Serbe ishte vendimtare. Gënjeshtër e qartë, dhe sigurisht plan i ligë, që dështoi. Edhe pa votat e Listës Serbe do të kalonte. Urime kalimin në lexim të parë të pagës së re minimale 264 euro që paraqet rritje për 55% përkatësisht 103%!”.
