VV’ja ia kërkon kthimin e nderit VLEN’it – Si po mundohet Kurti me i “josh” deputetët përmes Maqedonisë së Veriut?

Me votat që Lëvizja Vetëvendosje i posedon janë të pamjaftueshme për të zgjedhur kryetarin e Kuvendit e madje edhe për të votuar Qeverinë.

Vetëm për të arritur votat e duhura, kjo parti po mundohet të ndikojë përmes Maqedonisë së Veriut.

Kështu të paktën deklaroi kreu i Aleancës për Ardhmërinë e Kosovës (AAK), Ramush Haradinaj.

Ai deklaroi para mediave se Kurti i VV’së ka angazhuar VLEN-in e Maqedonisë së Veriut për të kontaktuar Adem Hoxhën në mënyrë që të ndryshojë qëndrimin për votim.

“Me dhjetëra njerëz të VLEN-it po vijnë nga Maqedonia e Veriut me e kontaktu Adem Hoxhën, me kërkesë të Albinit. Ky është Albini”, ka thënë Haradinaj pas dështimit të 19-të të seancës konstituive.

“E kanë kuzhinën e njëjtë atje, me këtë këtu. Qeveria atje nuk ka qenë aq miqësore ndaj shumë vlerave. Po shihet që e kanë një kuzhinë”, ka shtuar Haradinaj, që ka përmendur zëvendëskryeministrin e Maqedonisë, Izet Mexhiti, si njërin prej këtyre personave”, u shpreh Haradinaj.

Dy ditë më parë, edhe deputetja Duda Balje, tha se në këmbim të votës pro kryeparlamentarit të propozuar nga Vetëvendosje, i është ofruar mundësi punësimi si profesoreshë në një universitet në Maqedoni të Veriut.

Fshehurazi, Vetëvendosje ka filluar të kontaktojë edhe deputetët e LDK-së në mënyrë individuale.

Deputeti i LDK-së, Lutfi Haziri, ka konfirmuar se më shumë se dy kolegë të tij janë kontaktuar nga VV-ja.

“Përtej dyve, ma shumë janë kontaktu por është çështje që ata/ato i kanë zbardhë vet këto takime që nënkupton që LDK-ja është unike, na veprojmë bashkë dhe jemi të interesum me i dhanë oksigjen politik krejt kësaj situate”, ka deklaruar Haziri.

Sinjale për bashkëpunim për Qeveri, Vetëvendosje ka marrë nga Nisma Socialdemokrate që në Kuvend është e përfaqësuar me tre deputetë.

Ndryshe, seanca konstituive do të vazhdojë të martën e 27 majit./Periskopi/