Basha reagon pas hulumtimit skandaloz: Autorësia ime është vetëm për Kapitullin 3, nuk kam shkruar asgjë kundër UÇK-së

Përmes një postimi në rrjetet sociale, Basha ka mohuar çdo lidhje me përmbajtjen e kontestuar, duke sqaruar se autorësia e tij në punimin në fjalë kufizohet vetëm në një kapitull specifik.

“Punimi që po qarkullon në media është i vitit 2012, në kohën kur unë kam qenë student. Autorësia ime në këtë artikull i përket vetëm Kapitullit 3, i cili trajton depërtimin e Islamit fundamentalist në Evropën Juglindore, me fokus Kosovën. Këtu përfundon përgjegjësia ime lidhur me punimin në fjalë.”, ka shkruar ai.

Sipas Bashës, edhe vetë autorja e raportit, Jana Arsovska, e ka konfirmuar përmes një emaili që Basha ka qenë përgjegjës vetëm për Kapitullin 3 dhe jo për pjesët që përmendin UÇK-në apo figura të saj.

“Unë, Dimal Basha, e çmoj lart luftën e Ushtrisë Çlirimtare të Kosovës dhe sakrificën e popullit tonë për liri. Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë.”, shtoi ai.

Kryeparlamentari gjithashtu u kërkoi ndjesë qytetarëve të shqetësuar nga, siç e quajti ai, “raportimi i rremë”, dhe u bëri thirrje mediave për raportim të saktë dhe të përgjegjshëm, sidomos kur bëhet fjalë për çështje të ndjeshme kombëtare.

“I kërkoj falje qytetarëve që janë shqetësuar nga ky raportim i rremë, dhe prandaj lus mediat që të raportojnë drejtë dhe saktë, e në veçanti për tema kaq të ndjeshme, që nuk lidhen vetëm me mua personalisht, por me tërë popullin e Republikës së Kosovës.”, përfundoi Basha.

“Dekodim i Krimit të Organizuar Shqiptar” – Çka shkruante në librin e saj, kolegia e Dimal Bashës që shanin UÇK-në bashkë?