Britanikët u anashkaluan për Kryeprokurorin, Këshilli Prokurorial – Periskopit: Po e analizojmë reagimin e Ambasadës

Periskopi.com Lajme

Ambasada e Britanisë së Madhe është shprehur e befasuar pas vendimit të marrë nga ana e Këshillit Prokurorial të Kosovës, i cili gjatë ditës së djeshme ka hapur konkursin për emërimin e Kryeprokurorit të Shtetit, ndërsa KPK-ja për Periskopin ka thënë se do t’i përgjigjen reagimit të britanikëve.

Në reagimin e ambasadës britanike, thuhet se kanë ofruar mbështetje për rekrutimin e Kryeprokurorit, por kjo nuk është marrë parasysh dhe është shpallur vendimi.

“Ambasada Britanike ka vite që mbështet Këshillin Prokurorial të Kosovës (KPK). Së fundmi, kemi ofruar mbështetje edhe për rekrutimin e pozitës së Kryeprokurorit të Shtetit. Përderisa ne ishim duke pritur përgjigje nga KPK, vendimi i djeshëm për ta shpallur pozitën pa mbështetjen tonë, ishte befasues”, thuhet në reagim.

“Edhe përkundër faktit se një mundësi për të dëshmuar partneritet dhe transparencë u humb, presim që KPK të zhvillojë proces rekrutues të mirë, transparent dhe meritor”, thuhet tutje në reagim e ambasadës.

Këshilli Prokurorial i Kosovës në një përgjigje për Periskopin ka thënë se janë duke e analizuar reagimin e Ambasadës së Britanisë dhe se do të dalin me një njoftim.

“Ne jemi duke e analizuar dhe do të dalim me një përgjigje të përgjithshme për këtë.”, ka thënë për Periskopin, zëdhënësi i KPK-së, Astrit Kolaj.

Ndërkohë, Këshilli Prokurorial i Kosovës (KPK) të mërkurën në takimin e parë të mbajtur për vitin 2022 mori vendim që të shpallë konkurs për emërimin e Kryeprokurorit të Shtetit.

Konkursi për këtë pozitë u vendos të jetë i hapur 15 ditë pas shpalljes së tij, duke filluar nga 17 janari.

Në takimin e djeshëm, KPK-ja po ashtu e themeloi edhe Panelin Vlerësues për poentimin e kandidatëve që aplikojnë për pozitën e Kryeprokurorit të Shtetit.

Kryeprokurori aktual është Aleksandër Lumezi, të cilit i përfundon mandati më 21 prill./Periskopi/