Dëshmitari në Hagë: I akuzuari deshi të më vras me revole, nuk i shkrepi pasi s`pati plumba

Dëshmitari i mbrojtur  në dëshminë e tij kundër Salih Mustafës, ka deklaruar se i akuzuari ia ka vendosur revolen në kokë dhe se ka dashur ta vras. Por sipas dëshmisë arma nuk I ka shkrepur sepse nuk kishte pasur plumba.

Fillimisht dëshmitari tha se pasi ishte rrahur, një person ia kishte vënë revolen në kokë por që nuk kishte shkrepur.

“Jam kanë shtritë, njëri prej tyre e ka nxjerr revolen edhe ma ka qit kamën edhe ma ka shti revolen, e kam ni e kam ditë që po më vranë, edhe në një moment, ja ka ngre kamën e revoles ka bo shkrrup, nuk ka kris hiq edhe tha lshone se paska fat”, deklaroi dëshmitari.

Derisa kur u pyet nga Prokurori se kush ishte ai person dëshmitari tha se ishte personi kundër të cilit po dëshmonte.

“Ai person ishte ky njeriu që është këtu, i akuzuari është, e di që e ka pas kapelën e kuqe”, tha shkurt dëshmitari.

Dëshmitari i parë, identiteti i cilit është i mbrojtur ka thënë gjithashtu se ka qenë i ndaluar në afërsi të fshatit Zllash, ku është goditur nga dy persona me armë të gjata.

“Ma dhanë çokollatën, m’ka ra boks në kry edhe ma ka shti ni thes të zi në krye, ma s’kanë fol kurgjo me mu, veç me kanë thanë kena me të dhanë çokollata sa të shkojmë atje”, tha dëshmitari.

Seancën e kaluar Mustafa deklaroi se është i pafajshëm dhe braktisi seancën pasi sipas tij asnjë nga akuzat e lexuara nga prokurori i Dhomave të Specializuara të Kosovës, Jack Smith nuk ishte e vërtetë. Smith tha se të gjitha viktimat e komandant “Calit”, siç njihet Mustafa ishin shqiptarë të Kosovës.

Dëshmitari i parë në Hagë: Dy persona më dhanë çokollatë dhe më goditën boks