Haxhiu: S’po kundërshtohemi unë dhe Glauku, por PDK është e parëndësishme për VV-në.

Haxhiu në Facebook ka thënë se ajo dhe Konjufca kanë thënë të njejtën gjë por në mënyra tjera dhe se PDK është e parëndësishme për VV-në.

“Unë dhe Glauku nuk e kemi kundërshtuar njëri-tjetrin. E kemi thënë të njëjtën gjë, në mënyra tjera. Njëri në përpjekje për të vënë në pah se tash gjendemi në një kontekst të ri politik në të cilin PDK është e parëndësishme që Lëvizja t’i vihet përballë, e që u keqkuptua qëllimisht, e tjetri në gjuhë të thjeshtëzuar për t’ia rikujtuar PDK-së që mbetet po e vjetra”, tha Haxhiu.

“Qeveria e udhëhequr nga Lëvizja VETËVENDSOJE! është e pashmangshme. Ne po punojmë që ta sigurojmë këtë, dhe besojmë në vullnetin e qytetarëve dhe punën e Lëvizjes”, ka thënë Haxhiu.

Por ky reagim i deputetes Haxhiu është në kundërshtim me deklaratën e nënkryetarit të Vetëvendosjes, Glauk Konjufca, i cili ka thënë se nuk përjashtohet koalicioni me PDK-në.

“Nëse ne themi LDK-ja është e keqe se na rrëzoi, e pikërisht për këtë arsyje është që na e favorizojmë PDK për të bërë koalicon në zgjedhjet e reja, kjo është gabim pasi nuk ka këso pozicioni. Pozicioni është ky, VV shpresojmë prej pollulit t’i fitoj ëkto zgjedhje, që të jetë një fitore sa më mbizotëruese sa ma e madhe, të krijoj një mazhorancë në Kuvend të Kosovës. Nuk e favorizojmë dhe nuk e përjashtojmë PDK-në, pasi përjashtimi ka pasur kuptim në vitin 2019, tash është mosfavorizimi”, pati deklaruar Konjufca.

Ndërkohë, një ndër figurat kyqe të PDK’së për Periskopin ka thënë se nuk e përjashtojnë koalicioni me VV’në.

“Për  mua qeveri stabile dhe me interes për Kosovën, do të ishte një koalicion i madh, i fuqishëm dhe i përgjegjshëm që ndërton  politika shtetërore, dhe jo politika të lagjeve, jo politika të partive, dhe jo politika të individit, kjo është e domosdoshme tjerat s’kanë aspak rëndësi. Unë nuk e besoj që mund të  krijohet koalicion parazgjedhor mes VV-PDK,  por unë besoj në përgjegjshmërinë e njerëzve që e duan vendin dhe duan ta çojnë përpara dhe jo ta stagnojnë kështu siç ka ndodhur këto 5-6 vitet e fundit, por t’i japin një shtytje rregullimit të shtetit, kjo do të thotë të mos ketë askush vija të kuqe por të kemi dallime në programe, dhe unifikimi në programe, bërja e politikës shtetërore për  qeverisje është shumë e rëndësishme”, ka thënë z.Haliti për Periskopin.

Ndryshe, pas rrëzimit të Qeverisë Hoti si pasojë e vendimit të Gjykatës Kushtetuese, partitë politike në vend po bëhen gati për zgjedhje duke shqyrtuar edhe opsionet e mundshme për koalicion./Periskopi/