Kryetarit të Odës Ekonomike nuk i bën shumë përshtypje skandali me mishin e Brazilit, viziton kompaninë dhe i shpreh mirënjohje

Rafuna gjatë vizitës në këtë kompani, sic njofton faqja e Odës Ekonomike të Kosovës, i është shprehur mirënjohës për pritjen dhe prezantimin që i është bërë atje.

Siç duket, ky skandal i madh, duket se nuk i ka bërë shumë përshtypje kryetarit të OE-së, ku i ka uruar kompanisë që sa më shpejtë t’i tejkalojë këto vështirësi.

Ndryshe, Prokuroria Themelore në Prishtinë, më 3 pril kanë konfirmuar se janë nisur hetimet ndaj këtij rasti.

Skandali me “Apetit Group” shpërfaqi një sistem të tërë të korruptuar në Ministrinë e Bujqësisë ku një kompani, përmes lidhjeve me shtetin, arrin të falsifikojë disa hallka kontrolli dhe përfundimisht ta shes si mish të freskët të Kosovës, mishin e Brazilit, për të cilin nuk i dihet data.

Lexo edhe:

Skandali me mishin brazilian: Reagon kompania “Apetit sh.p.k”, i quan të pavërteta lajmet në media

Kujtojmë gjithashtu se Agjencia e Ushqimit dhe Veterinarisë (AUVK), ka urdhëruar ndaljen e menjëhershme të lëshimit të dokumenteve për eksport për biznesin e “Apetit”.

“Është formuar komisioni profesional i cili do të bëjë auditimin (gjurmushmërin/përputhshmërinë) e të gjitha hyrje daljeve të biznesit për të vërtetuar dyshimin e ngritur. Po ashtu janë informuar edhe autoritete tjera qe merren me taksat (doganat, ATK)”, ka thënë zëdhënësi i AUVK-së Lamir Thaçi për Periskopin.

Teksa ministri Faton Peci, pak minuta pas publikimit të këtij skandali, ka folur ekskluzivisht për Periskopin, ku ka thënë se do të ketë pasoja radikale nëse vërtetohet se mishi i Brazilit u shit sikur të ishte nga Kosova

Çfarë ka ndodhur?

Kompania me bazë në Kosovë “Apetit sh.p.k” blen mish nga Brazili, i cili vjen fillimisht në Shqipëri e që për destinacion final ka Kosovën.

Kur kjo kompani e merr mishin nga Brazili, përmes lidhjeve ilegale dhe korrupsionit në Agjencinë Shtetërore të Kosovës për Ushqim dhe Veterinari, që është në kuadër të Ministrisë së Bujqësisë, i heq vulat e Brazilit dhe i zëvendëson me vula të shtetit të Kosovës.

Më pas këtë mish e shet në Kosovë, por edhe e eksporton në Shqipëri.

Vetëm në vitin 2023 kishte rreth 600 tonë mish të eksportuar në Shqipëri nga Kosova.

Ky mish eksportohet si “mish vici i freskët i Kosovës”.

Në paketime vendosen vula të Kosovës me data fiktive, se kinse gjethet janë prerë vetëm para një muaji në Kosovë.

Këtë skandal fillimisht e zbuloi emisioni Stop në Klan të Shqipërisë.

Për t’u kryer ky operacion kriminal duhet të funksionojë një zinxhir i tërë i mashtrimit, nga pjesa e veterinarit që nuk bën kontroll të gjetheve të prera, te inspektori i AUVK-it, në Doganën e Kosovës e deri te pranuesi në Shqipëri.