Psikologu i shokuar me dhunën në It’s My Love: Ajo që i bëhet viktimës është bullizëm i sinkronizuar

Periskopi.com Lajme

Psikologu, Imri Zabeli ka dënuar ‘bullizmin e sinkronizuar’ dhe dhunën e shfaqur në episodin e fundit të emisionit të ashtuquajtur It’s My Love.

Kjo platformë mediale pretendon se ka për qëllim bashkimin e çifteve dhe dashurinë mes të përfshirëve, por në fakt së fundmi e ka shndërruar veten në një pellg neverie ku promovohet dhuna fizike e psikologjike, shkruan Periskopi.

Në mënyrë të sinkronizuar, drejtuesi i emisionit, analistja dhe konkurrentët e tjerë aplikojnë presion të vazhdueshëm mbi viktimën e dhunuar fizikisht paraprakisht nga një konkurrente tjetër, e cila pa menduar dy herë godet me shuplakë homologen pasi kjo e fundit i thotë zëshëm ‘mshele’.

Ajo që pason tutje është horror i vërtetë mediatik, teksa në mënyrë kriminale sulmohet vazhdimisht viktima dhe mundohet të nxirret fajtore madje në një event që është thjesht përtej djallëzores dhe përtej asaj që një njeri me logjikë e arsye të shëndoshë mund ta shikojë e dëgjojë.

Në lidhje me rastin, sot reagoi edhe edhe Këshilli për Mbrojtjen e të Drejtave dhe Lirive të Njeriut, duke dënuar rëndë aktin, derisa kërkoi edhe nga Komisioni i Pavarur i Mediave (KPM) që të marrë hapat e nevojshëm, pasi kemi të bëjmë me abuzim publik e linçues ndaj një viktime të dhunës.

Në një prononcim për Redaksinë, psikologu Zabeli është shprehur:

”E shikova emisionin, e shoh të pavlefshme të përfshihem në këtë nivel të emisionit.

”Ajo çka është evidente është komercializimi aq i keq dhe keqpërdorimi i gjendjeve emocionale të njerëzve.

”Çka i bëhet asaj vajze është bullizëm i sinkronizuar. Ku përkundër gjithçkaje, dhënia e të drejtës për të sulmuar fizikisht dikë është e dënueshme.” /Periskopi.com/