Zhvillime të papritura: LDK paralajmëron VV-në se për 10 minuta do të marrin përgjigje për Driton Selmanajn

Lidhja Demokratike e Kosovës pas pak çastesh do të mbajë konferencë për media, për të folur rreth zhurmës që Vetëvendosje po bën në Kuvend kundër zëvendëskryeministrit Driton Selmanaj.

Arben Gashi i LDK-së, i ka thënë Periskopit se pas pak çastesh do të dalin të flasin publikisht për këtë çështje.

“Brenda 5 ose 10 minutash do të flas publikisht për këtë çështje”, ka thënë Gashi për Periskopin.

Liburn Aliu i Vetëvendosjes, ka thënë se kjo parti nuk do ta lejojë Driton Selmanajn në Kuvend.

“Driton Selmanaj nuk mund të lejohet në Kuvend”, ka thënë Aliu në një konferencë për media.

Lëvizja Vetëvendosje sot ka ndërprerë seancën e Kuvendit pasi aty ka hyrë zëvendëskryeministri Driton Selmanaj.

Deputetë të kësaj partie, kanë grushtuar tavolinat duke brohoritur: ‘jashtë-jashtë”. Nënkryetarja e Kuvendit, Arbërie Nagavci tha se kjo seancë nuk mund të vazhdojë në këto kushte.

Krahas kësaj, Nagavci bëri të ditur se seanca tjetër ku është e paraparë interpelanca ndaj kryeministrit Hoti do të fillojë në orën 14:00.

“Kjo seancë nuk mund të vazhdojë në këto kushte, për vazhdimin e seancës vendoset në mbledhjen e radhës së kryesisë. Ndërkohë me seancës e re, të fituar sipas kryesisë vazhdojnë punimet në orën 14:00. Me kaq i ndërprehen punimet e kësaj seance”, tha ajo.

Përplasjet e mëdha që nisën në seancën e 19 nëntorit

Debati për personat e pagjetur, në seancën e 19 nëntorit të këtij viti, kishte ngjallur tensione mes deputetëve të Lidhjes Demokratike të Kosovës, Arben Gashi dhe deputetë të Lëvizjesh Vetëvendosje.

Krejt kjo ka ndodhur pas një përplasje fjalësh në mes të zëvendëskryeministrit Driton Selmanaj dhe deputetëve të Vetëvendosjes, ku këta të fundit i patën thënë se ai nuk ka të drejtë të flasë për çështjen e personave të pagjetur.