Hykmete Bajrami: Kam kërkuar rinumërim para Ramushit – veç kështu fajtorët marrin dënimin e merituar

Hykmete Bajrami e LDK-së, thotë se ajo ka kërkuar rinumërim para Aleancës për Ardhmërinë e Kosovës, përkatësisht zotit Ramush Haradinaj.

Në një deklaratë për Periskopin, znj.Bajrami ka thënë se rinumërimi do ta pastronte procesin dhe se ‘vetëm kështu keqpërdoruesit e votës do të merrnin dënimin e merituar’

“Unë kam kërkuar rinimrim para z. Ramush Haradinajt.Tashmë pas rinumrit të disa kutive është vërtëtuar se në QNR, ka pasë deformim të vullnetit qytetar dhe kjo tani vë në dyshim secilin rezultat të publikuar nga KQZ, sidomos për kandidatët. Unë besoj se runumrimi do të pastronte procesin, vetëm kështu keqpërdoruesit e votës do të merrinin denimin e merituar dhe mbi të gjitha është obligim ndaj qytetarëve dhe demokracisë”, ka thënë Bajrami për Periskopin.

Sot, Kryetari i AAK-së, Ramush Haradinaj ka thënë se kjo parti kërkon rinumërim të plotë të votave. Ai ka thënë se nuk e konteston rezultatin as të partisë së tij e as të partive të tjera, por thotë se të ‘dihet plotësisht e vërteta, duhet të ketë rinumërim të plotë”.

“Një takim me nënkryetarët e Aleancës, deputetë, sekretarë. Biseduam për procesin zgjedhor dhe ndërtimin e institucioneve. Falënderojmë qytetarët e Kosovës që kanë ndihmu që zgjedhjet të jenë të lira, demokratike”, tha Haradinaj pas takimit me strukturat e partisë, përcjell Periskopi.

“Jemi të shqetësuar me keqpërdorimet që kanë ndodhë në disa raste, kërkojmë nga organet e drejtësisë që kriminelët e votës të përfundojnë në burg, kërkojmë rinumërim të plotë të votave që të dihet e vërteta. Nuk kontestojmë rezultatin zgjedhor, përqindjen tonë, të VV-së, LDK-së apo PDK-së, nuk shoh pse duhet dikush me dalë kundër rinumërimit përvec nëse fshehim keqpërdorime për të cilat nuk din opinioni”, tha ai.

Ndërkohë dje, përfaqësuesi i AAK-së në KQZ, Ibrahim Selmonaj, shfaqi kërkesën e tij për rinumërim të plotë të votave.

“Dua ta përsëris faktin se në këtë proces zgjedhor ka pasë parregullësi që janë vërejtë. Ato kanë nis nga qendrat e vendvotimeve nga komisionerët. E kam thënë edhe më herët, përsërish qëndrimin e Aleancës që hetuesia të merret me secilin komisioner ose secilin përgjegjës në secilën qendër, në secilin vendvotim, aty ku ka bërë ndërhyrje, në rast bëhet me AAK që e dimë, por e vërteta është se ka edhe mes subjekteve tjera politike, kërkoj nga KQZ, të bëhet rinumërim i plotë, që të pastrohet ky proces, të evidentohen të gjitha rastet”, ka thënë Selmonaj, përcjell Periskopi.

Kjo kërkesë e AAK-së, hasi në kundërshti të ashpër dje në KQZ nga Vetëvendosja, përkatësisht përfaqësuesi i saj, z.Sami Kurteshi./PERISKOPI/