28 nëntori: Pamje mbresëlënëse nga qielli i Shkodrës

Një spektakël i jashtëzakonshëm dronësh ka ndriçuar sonte qiellin e Shkodrës, mbi sofren e madhe të shtruar në zemër të qytetit.

Pamjet janë publikuar nga kryeministri Edi Rama, i cili i ka ndarë ato vetëm një ditë para festës së 28 Nëntorit.

Në videon e publikuar, formacione të shumta dronësh krijojnë figura, simbole dhe koreografi të sinkronizuara në qiell, duke sjellë një atmosferë festive dhe emocionale për qytetarët e mbledhur në qendër të Shkodrës.

Rama e ka cilësuar këtë shfaqje si pjesë të aktiviteteve që po zhvillohen në prag të Ditës së Flamurit, ndërsa ka falënderuar organizatorët dhe publikun që e ka pritur me entuziazëm këtë performancë të rrallë vizuale.

Ngjarja ka tërhequr vëmendje të madhe në rrjete sociale, ku shumë qytetarë kanë ndarë reagimet dhe videot e tyre nga spektakli, duke e quajtur atë një prej aktiviteteve më të veçanta të zhvilluara në Shkodër së fundit.

Aktivitetet për 28 Nëntorin pritet të vazhdojnë edhe nesër me organizime të ndryshme kulturore dhe festive në mbarë vendin./Periskopi/