Kryeministri Kurti poston për ARKEP-in në FB në stilin Donald Trump: Bordi më i kualifikuar ndonjëherë
Kryeministri i Kosovës, Albin Kurti, ka shkruar në Facebook për bordin e ri të ARKEP-it, rregullatorit të komunikimeve elektronike dhe postare.
Ai e ka cilësuar bordin në fjalë si “më të kualifikuarin që institucioni i ARKEP-it ka pasur ndonjëherë”.
Emrat e përmendur janë Nazim Rrahimi, Shkumbin Hamiti, Lule Ahmedi, Rrezarta Duraku Ajeti dhe Arijan Qorrolli, përcjell Periskopi.
Shkumbin Hamiti besohet të jetë familjar i një bashkëpunëtori të Lëvizjes Vetëvendosje por po ashtu edhe profesionist i fushës.
Kurti gjatë ditës së djeshme ka folur edhe në Kuvendin e Kosovës për bordin e ri të AKP-së përkundër që ka premtuar se agjencia do të shuhej por pa treguar se si do të bëhej një gjë e tillë.
Statusi i plotë:
Me një ekip profesionistësh e profesionistesh me përvojë në institucione, në industri dhe në akademi, jemi të bindur që ky është Bordi më i kualifikuar që institucioni i ARKEP-it ka pasur ndonjëherë, dhe kemi besim të plotë që ky Bord do të jetësojë vizionin për zhvillimin e sektorit.
ARKEP është rregullator i komunikimeve elektronike dhe postare. Drejt vendosjes së tij në krye të detyrës kushtetuese dhe ligjore, tash kemi përbërjen e re të Bordit të ARKEP të votuar mbrëmë në Kuvendin e Republikës:
- Nazim Rahimi – Inxhinier i Postës dhe Telekomunikacionit me 19 vite përvojë në sektorin postar, në ministrinë e linjës dhe ARKEP;
- Shkumbin Hamiti – inxhinier i Telekomunikacionit e Informatikës me 17 vite përvojë pune në pozita udhëheqëse në Nokia. Hulumtues në akademi e industri me 12 patente për inovacionet e tij;
Prof. Dr. Lule Ahmedi –Profesoreshë në Universitetin e Prishtinës me përvojë 25 vjeçare dhe dhjetëra publikime ndërkombëtare;
znj. Rrezarta Duraku Ajeti – Inxhiniere e Telekomunikacionit dhe Master në Administrim Biznesi, me 12 vite përvojë pune në Telekomin e Kosovës;
- Arijan Qorolli – Ekonomist me 16 vite përvojë pune të analizë tregu në ARKEP.
