Reuters shkruan për situatën në veri të Kosovës

Mediumi prestigjioz Reuters ka publikuar një artikull në lidhje me situatën aktuale në veri të Kosovës.

Reuters, përmes këtij shkrimi, permendi incidentin e mëhershëm në mes të policisë dhe grupeve kriminale serbe, të cilët shkëmbyen zjarr në mes njëri-tjetrit, pas bllokimit të disa rrugëve në komunat veriore.

“Serbët e Kosovës dhe policia e vendit shkëmbyen armë zjarri të shtunën pas një shpërthimi tensionesh në pjesën e paqëndrueshme veriore të vendit. Më herët gjatë ditës serbët nga veriu i Kosovës bllokuan rrugët kryesore në veri për të protestuar kundër arrestimit të një ish-pjesëtari të policisë së Kosovës, i cili u largua nga posti i tij muajin e kaluar së bashku me serbët e tjerë etnikë. Njësitet policore, në vetëmbrojtje, u detyruan t’u përgjigjen me armë zjarri kriminelëve të cilët u zmbrapsën dhe vrapuan në drejtime të panjohura, thuhet në njoftimin e policisë”, thuhet në artikullin e Reuters.

Artikulli flet edhe për vendimin e presidentes së vendit për shtyrjen e zgjedhjeve për 23 prill 2023 në Mitorvicë e Veriut, Leposaviq, Zveçan e Zubin Potok, që ishte paraparë të mbaheshin më 18 dhjetor.

Në këtë shkrim flitet edhe për bllokimin e dy pikave kufitare në veri të vendit, Bërnjak e Jarinjë, transmeton Klankosova.tv

“Kryetarët serbë në komunat veriore të Kosovës, së bashku me gjykatësit vendas dhe rreth 600 policë, dhanë dorëheqjen muajin e kaluar në shenjë proteste ndaj një vendimi të qeverisë për të zëvendësuar targat e makinave të lëshuara nga Beogradi me ato të Prishtinës”, thuhet tutje.

Aty përmendet edhe deklarata e presidentit serb Aleksadar Vuçiq, që i kërkoi misionit paqeruajtës të NATO-s, KFOR, që ta lejonte Serbinë të vendoste trupa dhe polici në Kosovë, megjithëse ai pranoi se nuk kishte asnjë shans për t’u dhënë leje.