Abdixhiku: Kurti i njeh bandat me emëra e po i lë të lirë, ndërsa sulmon miqtë

Kryetari i LDK-së, Lumir Abdixhiku, në seancën e sotme të Kuvendit ku po debatohet për ngjarjet e fundit në veri të Kosovës, ka thënë se Kosova gjendet në një situatë të paprecedentë.

“Sot po bëhet një javë nga sulmi jo i paprecedentë dhe jo i rrallë i bandave kriminale në Veri që kryeministri po i njeh me emër dhe mbiemër, por janë ende në Veri të paarrestuar. Por, ky po i njeh dhe po na ligjëron për to, por janë të lirë kundrejt institucioneve të Republikës së Kosovës, përkatësisht zyrave të kryetarëve në Veri”.

Kreu i LDK-së tha se sulmi i nisur ndaj policisë nga banda që kryeministri i njeh, por s’i arreston, ndaj gazetarëve shqiptarë u shndërrua shpejt në sulm ndaj ushtarëve paqeruajtës të KFOR-it.

Në një përballje të tillë, Abdixhiku tha se anët e shpërfaqura kanë ndryshuar në substancë.

“Në një situatë të pamenduar më parë, të paprecedentë dhe gjithsesi të rrallë, Kosova ende vazhdon të sulmohet prej këtyre bandave e kryeministri i Kosovës është në sulm fatkeq ndaj miqve dhe aleatëve tonë ndërkombëtarë. Kjo është gjendja sot.

Për reagimet e Sekretarit Blinken, të BE-së e NATO-s, Abdixhiku tha se u kthyen kundër Kosovës për një kauzë, të cilën ai e konsideron të drejtë, për shkak të veprimeve të Kurtit.

“Këto reagime kundër shtetit tonë, kundër Republikës së Kosovës në një kauzë të drejtë janë si pasojë veprimit e keqveprimeve diplomatike dhe strategjike të një njeriu të vetëm – të atij që e mban postin e kryeministrit të Kosovës”.