Sveçla zgjohet nga gjumi, vjen me reagimin e parë pas vrasjes së policit në veri: Terroristët janë të rrethuar, është koha e fundit që ata të dorëzohen

Në veri të vendit është vrarë një polic dhe dy të tjerë janë plagosur. Personat e dyshuar dhe të armatosur rëndë po vazhdojnë të gjuajnë në drejtim të Policisë së Kosovës, shkruan Periskopi.

Por pas krejt këtyre zhvillimeve ministrit Sveçla i doli gjumi tash.

Ai reagoi për herë të parë pas më shumë se 11 orëve prej kur ndodhi ngjarja.

Ani pse si ministër i Punëve të Brendshme i takon të njoftoi për cdo zhvillim ku cenohet integriteti territorial i Kosovës, Svecla për këtë është i vonë.

Në postimin e bërë para pak minutave Svecla njoftoi se burimi i sulmeve me armë zjarri është manastiri në Banjska të Zveçanit dhe përreth.

“Një numër i tyre janë të barrikaduar brenda manastirit në Banjska edhe sipas deklarimeve zyrtare të Dioqezës Rashkë-Prizren. Këta terroristë janë të rrethuar nga njësitë policore dhe është koha e fundit që të dorëzohen”, ka shkrur Svecla

Postimi i plotë:

Grupet kriminale të mirë organizuara dhe të dirigjuara nga Beogradi, pas bllokimit të urës me mjete të rënda dhe pamundësimit të qasjes në fshatit Bajnskë, kanë sulmuar në pritë njësitë policore, ku për pasojë rreshteri i policisë së rendit Afrim Bunjaku është vrarë, dhe dy të tjerë janë plagosur gjendja e të cilëve është stabile.

Sulmi ka ardhur dhe po vazhdon akoma nga njësi profesionale të përgatitura dhe me një përbërje prej mbi 30 personave, të uniformuar, të maskuar dhe të pajisur ushtarakisht me mjete të blinduara dhe armë të rënda të llojeve të ndryshme.Burimi i sulmeve me armë zjarri është manastiri në Banjska të Zveçanit dhe përreth.

Njësitë tona policore janë aktivizuar në terren, të njëjtat kohë pas kohe janë duke u sulmuar me armë zjarri nga pozicione të ndryshme, nga grupet e organizuara dhe të armatosura rëndë.

Një numër i tyre janë të barrikaduar brenda manastirit në Banjska edhe sipas deklarimeve zyrtare të Dioqezës Rashkë-Prizren. Këta terroristë janë të rrethuar nga njësitë policore dhe është koha e fundit që të dorëzohen.

I shpreh ngushëllimet më të sinqerta familjarëve të Rreshterit Afrim Bunjaku dhe të gjithë pjesëtarëve të Policisë së Kosovës.
Në këto momente të vështira qëndrojmë bashkë dhe fuqishëm pranë tyre.