Kapiteni Rrahmani pritet të mungojë ndaj Suedisë
Qendërmbrojtësi Amir Rrahmani pritet t’i mungojë Kosovës në ndeshjen ndaj Suedisë. Kosova të hënën nga ora 20:45 e pret Suedinë në “Fadil Vokrri”. Ndeshja është e vlefshme për kualifikimet e Kupës së Botës 2026.
Rrahmani që është pjesë e kampionit në fuqi të Italisë, Napoli, u lëndua të premten mbrëma në disfatën e thellë 4:0 që e pësoi Kosova nga Zvicra në Basel, raporton Koha.net, transmeton Periskopi.
Mediumet italiane kanë raportuar të shtunën se Rrahmani ka një lëndim në kofshën e djathtë dhe për këtë arsye ai mund të mungojë ndaj Suedisë.
Mësohet se pas ndeshjes ka pasur kontakt mes stafit mjekësor të Përfaqësueses së Kosovës dhe atij të Napolit.
31-vjeçari Rrahmani mund të mungojë edhe në ndeshjen e ardhshme të Napolit në Serie A ndaj Fiorentinas./Periskopi
