Kriza në Francë: Lecornu thotë se misioni i tij ka përfunduar, vendi mund të ketë kryeministër të ri brenda 48 orëve

Franca mund të ketë një kryeministër të ri brenda 48 orëve, ka deklaruar këtë të mërkurë, 8 tetor, kryeministri në largim, Sébastien Lecornu, gjatë një deklarate televizive që shënon një kthesë të re në krizën politike që ka përfshirë vendin pas zgjedhjeve legjislative të parakohshme të verës.

“Mund të kemi një kryeministër të ri brenda 48 orëve,” deklaroi Lecornu në televizionin France 2, duke shtuar se “perspektiva e një shpërndarjeje të Parlamentit po bëhet gjithnjë e më e largët”.

Një nga temat më të diskutueshme në negociatat për krijimin e një qeverie të re mbetet reforma e diskutueshme e pensioneve, e shtyrë përpara nga presidenti Emmanuel Macron dhe e kundërshtuar gjerësisht nga e majta dhe sindikatat.

“Reforma e pensioneve është një pikë bllokuese e madhe,” tha Lecornu, duke theksuar se “nevojitet një mënyrë për të mundësuar një debat real për këtë reformë.”

Reforma, e cila ngriti moshën e daljes në pension nga 62 në 64 vjeç, është bërë simbol i ndarjes politike në vend. Lecornu paralajmëroi gjithashtu se pezullimi i saj do t’i kushtonte shtetit 3 miliardë euro në vitin 2027.

Një tjetër sfidë madhore është edhe miratimi i buxhetit për vitin 2026. Lecornu njoftoi se projektbuxheti do të dorëzohet të hënën, duke paralajmëruar pasoja të rënda nëse vendi mbetet pa buxhet në fund të vitit.

“Ka shumë çështje për t’u diskutuar në këtë buxhet,” tha ai, “por pasojat e mosmiratimit të tij do të ishin drastike për vendin.”

Një kryeministër i majtë? Vendimi i mbetet Macron-it

Në një deklaratë që ngjall spekulime për një qeveri të përbashkët me të majtën, Lecornu theksoi se vendimi për të emëruar një kryeministër nga e majta i takon presidentit Macron.

“Është përgjegjësi e kreut të shtetit të udhëheqë negociatat përfundimtare,” tha ai. “Unë nuk jam në kërkim të postit të kryeministrit. E konsideroj misionin tim të përmbushur.”

Ndërkohë, presioni ndaj Macron për të pranuar një qeveri bashkëjetese me të majtën po rritet. Partia e Gjelbër, në një deklaratë të publikuar të mërkurën, u shpreh se nëse Macron refuzon bashkëjetesën, “ai duhet të largohet”.

“Kampi presidencial ka zgjedhur të mbështetet në një aleancë të paqëndrueshme me ‘Les Républicains’, në vend që të hapë diskutime serioze me NFP (Aleanca e Majtë), e cila fitoi shumicën e votave në zgjedhjet e fundit legjislative,” thuhet në deklaratë.

Bashkëjetesa është një praktikë kushtetuese franceze ku presidenti ndan pushtetin me një kryeministër që ka mbështetjen e shumicës parlamentare. Franca ka kaluar tre periudha të tilla, e fundit prej tyre mes viteve 1997–2002, kur Jacques Chirac ndante pushtetin me socialistin Lionel Jospin.

Pas dorëheqjes së papritur të qeverisë së Lecornu vetëm 14 orë pas shpalljes së kabinetit të ri, Franca ndodhet në një moment kyç politik. Tani, sytë janë të kthyer nga Elysee dhe vendimi i Macron për të shmangur zgjedhjet e reja dhe për të ndërtuar një qeveri që mund të sigurojë shumicën parlamentare.

Zhvillimet e ardhshme do të përcaktojnë jo vetëm emrin e kryeministrit të ri, por edhe drejtimin politik të Francës në vitet në vijim. Me një qeveri të brishtë, një buxhet të diskutueshëm dhe tensione të thella shoqërore, të ardhmes i mungon qartësia dhe koha është e kufizuar.