Që 6 muaj pa pagesë: Nga e hëna pezullohen linjat e kompanive private të transportit publik në Prishtinë
Kompanitë private të transportit të autobusëve në Prishtinë, do të protestojnë të hënën, më 24 nëntor, në ora 09:00 para objektit të Komunës së Prishtinës.
Me këtë rast, në shenjë proteste, kompanitë private të autobusëve nuk do të kryejnë shërbime gjatë ditës së hënë dhe nuk do të ketë transport për udhëtarë.
Protestën e kanë konfirmuar Shoqata e Transportit “Uni Trans” që përfshinë linjat private në Prishtinë.
Nga kjo shoqatë kanë bërë me dije që arsyeja e protestës është vonesa e pagesave për kompanitë private të transportit nga ana e Komunës së Prishtinës.
“Arsyeja e protestës lidhet me vonesat e pagesave nga Komuna e Prishtinës. Që gjashtë muaj, nuk kemi pranuar asnjë pagesë nga komuna për shërbimet që kemi ofruar”, kanë deklaruar nga shoqata.
Vonesat e pagesave nga ana e komunës nuk kanë dëmtuar vetëm kompanitë private. Edhe Ndërmarrja Publike komunale “Trafiku Urban”, po ashtu ka paralajmëruar se ofrimi i shërbimeve të transportit publik mund të pezullohet plotësisht nga java e ardhshme duke marrë parasysh rrethanat financiare dhe si pasojë e bllokimit të mjeteve buxhetore.
