Abdixhiku i reagon Kurtit e Muratit: Prishtina as nuk lakmohet e as nuk përdoret për beteja primitive të Don Kishotit me Sanço Pançot e tij
Kryetari i LDK-së, Lumir Abdixhiku, ka reaguar ashpër ndaj, siç i quan ai, bllokimeve të pushtetit ndaj Kryeqytetit gjatë vitit të fundit. Ai tha se Prishtina “foli e para dhe qartë” duke e rikthyer LDK-në si partinë e parë, ndërsa “bllokuesit i la larg”.
Sipas Abdixhikut, mesazhi i qytetarëve të Prishtinës nuk është kuptuar ende nga qeveria, por “më 28 dhjetor do ta marrin sërish”, përcjell Periskopi.
Ai akuzoi pushtetin se për 12 muaj e ka mbajtur Prishtinën pa buxhet, duke e lënë Kryeqytetin “si nën pushtim”, në një gjendje të bllokuar burokratike.
“Na u dashtë të shpenzojmë energji e kohë për ta mirëmbajtur Prishtinën me mund, të plaçkitur nga një sekt popullist që shkatërrimin e vendit e ka mision,” deklaroi ai, duke shtuar se pushteti ka shpërndarë “vitra pa ligj e pa legjitimitet” për interesa politike.
Abdixhiku theksoi se “koha e tyre po mbaron” dhe u bëri thirrje qytetarëve për bashkim.
“Prishtina do të flasë sërish; e para!”, përfundoi ai.
Postimi i plotë:
Prishtinën e bllokuan.
Dhe Prishtina foli e para, foli qartë. LDK-në e riktheu si parti të parë; bllokuesit i la larg.
Mesazhin e Prishtinës nuk e paskan marrë qartë. Do ta marrin me 28 dhjetor sërish. Sepse Prishtina as nuk lakmohet e as nuk përdoret për beteja primitive të Don Kishotit me Sanço Pançot e tij.
Mund të bllokoni. Mund dhe të pengoni; sepse vetëm kaq dini, vetëm kaq mundeni. Por propaganda nuk e mund të vërtetën dot. Për 12 muaj të tërë, sikurse nën pushtim, e mbajtët Kryeqytetin pa buxhet. Na u dashtë të shpenzojmë energji e kohë që të mirëmbajmë Prishtinën me mund, të plaçkitur nga një sekt popullist që shkatërrimin e vendit e ka mision. Teksa shpërndanin vitra për votë; pa ligj e pa legjitimitet, për Prishtinë, Kryeqytetin e vendit të vet, në llumin e madh të burokracisë vazhduan ta mbajnë për plot një vjet.
Koha e tyre po mbaron.
Le të bashkohemi të gjithë.
Prishtina do të flasë sërish; e para!
