Visar Azemi i LDK premton 80 milionë euro investime për ta kthyer Brezovicën në qendër rajonale të skijimit
Visar Azemi, kandidat i Lidhjes Demokratike të Kosovës (LDK) për deputet, ka deklaruar se Kosova ka një mundësi unike për të zhvilluar turizmin dimëror përmes investimeve të mëdha në Brezovicë.
Sipas Azemit, programi i LDK-së parasheh investime prej 80 milionë eurosh në zgjerimin e pistave të reja, instalimin e teleferikëve modernë dhe krijimin e kushteve për investime në hotelieri.
Ai kritikoi qeverinë aktuale për mungesë investimesh kapitale dhe theksoi se, me LDK-në në pushtet, Brezovica do të jetë një nga projektet kryesore për zhvillimin ekonomik dhe turistik të Kosovës.
“Ashtu qysh na gjatë muajve të verës shkojmë në Shqipni, lëjmë paret atje në bregdet, e ndihmojmë turizmin shqiptar, tash na e kem një shansë unike që me investu, me kthy turizmin, sidomos muajt e dimrit në Kosovë me Brezovicën. Jo veç për Shqipninë por edhe për vendet e rajonit, e që besa edhe për veti. Me programin tonë, në Brezovicë kena me investu 80 milionë euro në zgjërimin e pistave t’reja, në instalimin e teleferikëve modern dhe në mundësitë për investime në hotelieri, në mënyrë që Brezovica me u kthy në destinacionin kryesor të rajonit për skijim. Kjo qeveri nuk bëri asnjë investim në projekte kapitale, e tash është koha që me Lidhjen Demokratike të Kosovës t’i japim hov zhvillimit të vendit dhe këtyre investimeve. Brezovica do të jetë një nga projektet kryesore të saj”, tha ai.
