Shkollat do të rihapen pas rrëmbimeve masive në Nigeri
Zyrtarët nigerianë kanë njoftuar se shkollat në shtetin e Nigerit do të fillojnë të rihapen më vonë këtë muaj, pas një rrëmbimi masiv në nëntor që detyroi mbylljen e tyre si pjesë e masave të sigurisë emergjente, ka raportuar BBC.
Nga 12 janari, shkollat publike dhe private “në zona të sigurta” do të lejohen të rihapen, tha ministria e arsimit e shtetit të Nigerit në një deklaratë.
Vendimi vjen pas vlerësimeve të sigurisë dhe “konsultimeve të gjera” me agjencitë e sigurisë, shtoi ajo.
Rrëmbimi në nëntor i më shumë se 250 studentëve dhe stafit nga shkolla katolike St Mary në Papiri, Nigeria perëndimore, ishte një nga rrëmbimet më të këqija të vendit deri më sot.
Për vite me radhë, bandat e armatosura kriminale, të njohura në vend si banditë, kanë kryer vrasje dhe rrëmbime në shumë pjesë të Nigerisë – por raportet në rajonin veri-qendror janë rritur kohët e fundit.
Shkollat dhe vendet e adhurimit janë shënjestruar gjithnjë e më shumë atje.
Qeveria kohët e fundit i ka klasifikuar grupet kriminale si terroriste dhe, ndërsa pagesa e shpërblimit është e paligjshme në Nigeri, ka pretendime se kjo shpesh injorohet.
Më shumë se 1,500 fëmijë janë rrëmbyer nga shkollat e vendit që nga viti 2014, kur 276 vajza u morën gjatë rrëmbimit masiv famëkeq në Chibok.
