Trazira të mëdha shpërthejnë në Ugandë pas zgjedhjeve, raportohen viktima

Të paktën shtatë persona u vranë gjatë natës në Ugandën qendrore, tha policia pas zgjedhjeve kombëtare që dukeshin se do të zgjasnin sundimin e presidentit veteran Yoweri Museveni në një dekadë të pestë.

Rezultatet e shpallura nga komisioni zgjedhor treguan se Museveni kishte fituar mbi 75% të votave në zgjedhjet presidenciale të së enjtes, bazuar në numërimin e votave nga 59% e qendrave të votimit.

Sfiduesi i tij kryesor, këngëtari popullor Bobi Wine , ishte pas me rreth 21% dhe votat e mbetura u ndanë midis gjashtë kandidatëve të tjerë.

Pas një fushate të shoqëruar me përplasje në tubimet e opozitës dhe atë që Kombet e Bashkuara e quajtën shtypje dhe frikësim të përhapur, votimi kaloi në mënyrë paqësore, shkruan Reuters.

Por dhuna shpërtheu gjatë natës në qytetin Butambala, rreth 55 km në jugperëndim të kryeqytetit Kampala, sipas një zëdhënësi të policisë dhe një anëtari të parlamentit nga zona, të cilët dhanë shpjegime të ndryshme për ngjarjet.

Zëdhënësja e policisë lokale, Lydia Tumushabe, tha se “banditët” e opozitës së armatosur sulmuan një stacion policie dhe një qendër numërimi votash.

“Siguria reagoi në vetëmbrojtje sepse këta njerëz erdhën në numër të madh. Policia qëlloi në vetëmbrojtje”, tha ajo, duke shtuar se 25 persona u arrestuan.

Ndryshe, zgjedhjet janë parë gjerësisht si një provë e forcës politike dhe aftësisë së 81-vjeçarit Museveni për të shmangur llojin e trazirave që kanë tronditur fqinjët Tanzani dhe Kenia.

Museveni u kishte thënë gazetarëve pasi hodhi votën e tij se priste të fitonte me 80% të votave “nëse nuk ka mashtrim”. /Telegrafi/