Kapen në Tiranë dy persona në kërkim ndërkombëtar për trafikim të qenieve njerëzore, pritet ekstradimi në Kosovë
Policia e Shtetit ka arrestuar në Tiranë dy shtetas, R. B. dhe G. H., të shpallur në kërkim ndërkombëtar, gjatë dy fazave të operacionit “Operacionalja”. Arrestimi u bë nga Forca e Posaçme Operacionale, pas lokalizimit të tyre në kryeqytet.
Sipas autoriteteve, për dy të arrestuarit ishte lëshuar urdhër arresti ndërkombëtar nga UNMIK në Kosovë, pasi dyshohen për përfshirje në grup të strukturuar kriminal dhe trafikim të qenieve njerëzore. Ata janë ndaluar me qëllim ekstradimi dhe po vijojnë procedurat për dërgimin e tyre drejt autoriteteve të Kosovës.
Njoftimi i plotë:
Policia e Shtetit
Vijojnë operacionet e njëpasnjëshme nga Drejtoria e Forcës së Posaçme Operacionale e DPPSh-së, për lokalizimin dhe kapjen e personave të shpallur në kërkim ndërkombëtar.
Finalizohen gjatë 24 orëve të fundit dy faza të tjera të operacionit policor të koduar “Operacionalja”.
Gjatë dy fazave, Operacionalja 78 dhe Operacionalja 79, janë kapur dhe vënë në pranga, me qëllim ekstradimi drejt Kosovës, dy shtetas.
Në vijim të punës për gjurmimin, lokalizimin dhe kapjen e personave të shpallur në kërkim ndërkombëtar, shërbimet e Drejtorisë së Forcës së Posaçme Operacionale, bazuar në informacionet e siguruara, organizuan dhe finalizuan fazat 78-të dhe 79-të të operacionit policor të koduar “Operacionalja”.
Në kuadër të këtyre fazave, në qytetin e Tiranës, u bë kapja dhe ndalimi i shtetasve R. B. dhe G. H., banues në Tiranë.
Këta dy shtetas ishin të shpallur në kërkim ndërkombëtar, pasi Përfaqësuesi Special i Sekretarit të Përgjithshëm të UNMIK/Kosovë, më datë 13.01.2026, ka lëshuar urdhër arresti ndërkombëtar për këta dy shtetas, si të dyshuar për kryerjen e veprave penale “Pjesëmarrje ose organizim i grupit të strukturuar kriminal”, në fushën e trafikimit të qenieve njerëzore, parashikuar nga Kodi Penal i Kosovës.
Shtetasit u ndaluan me qëllim ekstradimin drejt autoriteteve të Kosovës.
Vijon puna për finalizimin e procedurës së ekstradimit të këtyre shtetasve drejt Kosovës.
