Prokuroria Themelore në Gjilan ka njoftuar se ka autorizuar Policinë e Kosovës për ndërmarrjen e veprimeve hetimore lidhur me rastin në fjalë.

Arianit Sllamnikun, ka konfirmuar se është intervistuar nga Policia e Kosovës dhe se u rekomandon fëmijëve ilaç për kafshë.

Sipas Sllamnikut, dyshimet kanë ardhur nga disa prindër që, sipas tij, kanë reaguar pa e provuar më parë te fëmijët e tyre atë që ai ka sugjeruar.

“Një nënë, a dy, kanë dyshuar në protokollin tim, pa e provuar te fëmijët e vet. Me dhënë mendim a duhet me u licencu? Unë kam zyre të konsulencave, bëj aktivitetet e mia, jam në televizione. Aty i bëj analizat e mia politike, gjeopolitike dhe ekonomike,” ka deklaruar ai për indeksonline.

Sllamniku ka shtuar se kohët e fundit qytetarët e kanë kontaktuar edhe për çështje shëndetësore, ku ai, sipas tij, ka dhënë vetëm mendime dhe sugjerime.

“Unë vetëm jap mendim: ‘Bleje këtë, merre këtë, jepja këtë, bëja këtë’. Janë sugjerime. Sa i përket raportimeve se ilaçi ishte për kafshë, unë kam sugjeruar ‘Fenbendazole antiparasitic’. I njëjti bari përdoret edhe kundër kancerit,” ka thënë ai.

Ndërkohë, nga Prokuroria Themelore në Gjilan kanë konfirmuar zyrtarisht se me datë 20 janar 2026 kanë autorizuar Policinë e Kosovës për veprime hetimore.

“Ju njoftojmë se Prokuroria Themelore në Gjilan, sot me datë 20 janar 2026, ka autorizuar Policinë e Kosovës për ndërmarrjen e veprimeve hetimore lidhur me rastin për të cilin jeni interesuar. Prokuroria Themelore në Gjilan do t’ju mbajë të informuar për veprimet e mëtejshme. Ju faleminderit për bashkëpunimin tuaj,” thuhet në njoftimin e Prokurorisë.