Gjuajtje me armë në Podujevë, policia jep detaje
Një incident me armë zjarri është raportuar të mërkurën rreth orës 13:30 në rrugën “Zahir Pajaziti” në Podujevë.
Lajmin e ka konfirmuar zëdhënësja e Policisë për rajonin e Prishtinës, Flora Ahmeti, e cila ka bërë të ditur se menjëherë pas pranimit të informatës, njësitet policore kanë dalë në vendin e ngjarjes dhe kanë arrestuar personin e dyshuar.
“Rreth orës 13:30 është raportuar për një gjuajtje me armë zjarri në rrugën ‘Zahir Pajaziti’ në Podujevë. Menjëherë pas marrjes së informatës, policia ka dalë në vendin e ngjarjes dhe ka arrestuar personin e dyshuar. Policia ka nisur hetimet lidhur me rrethanat që karakterizojnë rastin”, ka thënë Ahmeti.
Ajo ka bërë të ditur tutje se nuk është raportuar për ndonjë të lënduar si shkak i gjuajtjes me armë zjarri.
