OEK paralajmëron pasoja ekonomike nga rritja e re e çmimit të energjisë elektrike

Kryetari i Odës Ekonomike të Kosovës, Lulzim Rafuna, ka shprehur shqetësimin e OEK-së lidhur me kërkesat për rritjen e çmimit të energjisë elektrike, duke paralajmëruar pasoja të drejtpërdrejta për bizneset dhe qytetarët.

Sipas tij, një rritje e re do të ndikonte në koston e prodhimit, standardin jetësor dhe fuqinë blerëse në vend.

Rafuna tha se energjia elektrike përbën një kosto operative thelbësore për bizneset, veçanërisht për prodhuesit vendorë, të cilët tashmë përballen me një disbalancë të thellë tregtare.

Importet, sipas tij, kanë tejkaluar 7 miliardë euro, ndërsa eksportet kanë rënë në 940 milionë euro, nga 944 milionë sa ishin një vit më parë. Për qytetarët, ai vlerësoi se çdo rritje shtesë do të godiste drejtpërdrejt buxhetet familjare dhe konsumin.

Ai kujtoi se qytetarët tashmë janë përballur me një rritje prej 16.1 për qind në prill të vitit të kaluar, ndërsa bizneset e mëdha janë nxjerrë në tregun e lirë, ku faturat për disa kompani janë rritur nga 200 deri në 400 për qind.

Rafuna theksoi se OEK do të presë zyrtarizimin e vendimeve për të bërë një analizë të detajuar dhe për të kërkuar përfshirjen e Qeverisë dhe të Zyrës së Rregullatorit për Energji.

Ndërkohë, KESCO ka kërkuar rritje mbi 21.3 për qind të tarifave për vitin 2026, me të hyra të lejuara maksimale prej 528.78 milionë euro, duke u thirrur në rritjen e kostove operative, importin e energjisë dhe sigurinë e furnizimit.