Ushtria amerikane ka lëvizur dhjetëra aeroplanë luftarakë drejt Lindjes së Mesme gjatë 24 orëve të fundit, sipas të dhënave me burim të hapur për përcjelljen e fluturimeve.

Ky zhvillim vjen në kohën kur Shtetet e Bashkuara dhe Irani e zhvilluan rundin e dytë të bisedimeve në Zvicër rreth programit bërthamor të Teheranit, shkruan gazeta “The Times of Israel”.

Në mesin e aeroplanëve që janë zhvendosur përfshihen ata të tipave F-22, F-35 dhe F-16. Në lëvizje janë vërejtur edhe disa aeroplanë për rimbushje me karburant, sipas disa llogarive në rrjete sociale që u kushtohen përcjelljes së fluturimeve ushtarake.

Një zyrtar amerikan gjithashtu i konfirmoi mediumit amerikan “Axios” se më shumë se 50 aeroplanë luftarakë janë zhvendosur në rajon gjatë 24 orëve të fundit.

Negociatorët u mblodhën në Gjenevë në kohën e një grumbullimi domethënës ushtarak të forcave amerikane në rajon. Presidenti amerikan, Donald Trump, disa herë ka kërcënuar me përdorimin e forcës ushtarake kundër Iranit, fillimisht për shkak të shtypjes vdekjeprurëse të protestave e më pas për shkak të programit bërthamor të Teheranit.

Ministri i Jashtëm i Iranit tha të martën se vendi i tij dhe Shtetet e Bashkuara u pajtuan në bisedime për “parimet udhëzuese”, por se kjo nuk do të thotë se marrëveshja është afër.