Shkurtimi i orarit mësimor për Ramazan, Hoxha: Komuna e Prishtinës e shkeli Kushtetutën e Kosovës

Eliza Hoxha nga PDK ka reaguar nga vendimit të Komunës së Prishtinës për shkurtimin e procesit mësimor në muajin e Ramazanit.

Hoxha vlerësoi se Komuna e ka shkelur Kushtetutën e Kosovës.

“Liritë fetare dhe liritë e tjera individuale janë të garantuara në Kushtetutë dhe mund të ushtrohen si e drejtë individuale dhe grupore brenda llojit por vendimmarrja e tyre nuk mund të mbivendoset mbi normat juridike publike”, shkroi Hoxha mes tjerash

Postimi i plotë:

Shteti i Kosovës si shtet laik për nga Kushtetuta jetën publike e rregullon dhe e organizon bazuar në normat juridike që dalin nga Kuvendi i Kosovës dhe Ministritë e linjës.

Liritë fetare dhe liritë e tjera individuale janë të garantuara në Kushtetutë dhe mund të ushtrohen si e drejtë individuale dhe grupore brenda llojit por vendimmarrja e tyre nuk mund të mbivendoset mbi normat juridike publike.

Liritë janë të plota kur ushtrohen brenda domenit dhe nuk cenojne natyrën e rregullimit shtetëror.

Komuna e Prishtinës sot e ka shkelur Kushtetutën e Kosovës.

Kushtetuta dhe ligjet e Kosovës duhet të vlejnë njësoj për të gjitha institucionet e Kosovës, pa dallim.

Respekt për agjeruesit e besimtarët!