Shorti i Champions League, “rrezik” për super përballje

Gjashtëmbëdhjetë skuadrat e kualifikuara do të mësojnë kundërshtarët e tyre në shortin e fazës me eliminim direkt të Ligës së Kampionëve, të premten në orën 11:00.

Arsenali, Liverpool, Chelsea, Manchester City dhe Tottenham Hotspur ishin tashmë në vazon e shortit, ndërsa Newcastle iu bashkua atyre në fazën e 1/16-ave pas fitores me rezultat të përgjithshëm 9-3 ndaj Qarabag në raundin “play-off”.

Tetë fituesit e fazës “play-off” me ndeshje vajtje-ardhje do t’u bashkohen tetë skuadrave të para të renditura në tabelën e fazës së ligës në short.

Shorti i së premtes do të përcaktojë gjithashtu anën e skemës për të gjitha skuadrat, që do të thotë se ato do të dinë se me kë mund të përballen potencialisht në çerekfinale, gjysmëfinale dhe finale. Ndeshjet e para të 1/16-ave do të zhvillohen më 10 ose 11 mars, ndërsa ndeshjet e kthimit janë planifikuar për 17-18 mars.

Finalja e sezonit 2025-26 do të zhvillohet më 30 maj në “Puskas Arena” në Budapest, Hungari. Tetë fituesit e “play-off”-it do të përballen me tetë skuadrat e para të renditura në fazën e ligës.

Nga ky moment e tutje, gara do të zhvillohet me format eliminimi direkt, ku çdo përballje, përveç finales, do të luhet me sistem vajtje-ardhje. Ashtu si në “play-off”, renditja përfundimtare e skuadrave në fazën e ligës do të ndikojë në shortin e 1/16-ave, ku skuadrat e renditura në tetëshen e parë do të jenë të favorizuara dhe do ta luajnë ndeshjen e kthimit në shtëpi.

Ky është sezoni i parë ku pozicioni i skuadrave në fazën e ligës do të ndikojë gjithashtu në përcaktimin e shortit për çerekfinalet dhe gjysmëfinalet. Skuadrat që përfundojnë nga vendi i parë deri në të katërtin në fund të fazës së ligës do të jenë të favorizuara në çerekfinale dhe do ta luajnë ndeshjen e kthimit në shtëpi.

Dy skuadrat që përfundojnë në vendin e parë dhe të dytë në ligë do të jenë gjithashtu të favorizuara në gjysmëfinale, duke fituar të drejtën ta luajnë në shtëpi ndeshjen e kthimit, nëse arrijnë deri në atë fazë.

Nëse një skuadër e favorizuar eliminohet para çerekfinales apo gjysmëfinales, skuadra që e eliminon do të trashëgojë pozicionin e saj si e favorizuar. (A2 )