A është e vërtet se nëse nxirrni një kime të thinjur do t’ju dalin dy?

Shumë njerëz mendojnë se nëse e shkulin një qime, do të rriten disa të tjera në vend të saj, gjë që do të ishte një zgjidhje e mirë për rrallimin e flokëve. Por kjo nuk është e vërtetë. Përkundrazi, shkulja e përsëritur mund të dëmtojë folikulat dhe të bëjë që floku të mos rritet më kurrë,shkruan TheGuardian.

“Do të doja që duke shkulur një qime të rriteshin disa të tjera,” thotë Desmond Tobin, profesor i shkencave dermatologjike në Universitetin e Kolegjit të Dublinit.

“Do të ishte një zgjidhje shumë e mirë për njerëzit që u rrallohen flokët dhe nuk janë të kënaqur me këtë.”

Fatkeqësisht, kjo është një mit. Lëkura e kokës është e mbuluar me folikula (që prodhojnë qime) dhe secila prej tyre prodhon vetëm një fije floku. Shkulja e një floku nuk bën që nga i njëjti folikul të rriten disa qime.

Në fakt, shkulja e përsëritur e qimeve mund të ketë efekt të kundërt. Me kalimin e kohës, dëmtimi mund të bëjë që floku të mos rritet më fare. Tobin përmend modën e vetullave shumë të holla në vitet 1990 dhe në fillim të viteve 2000, kur shumë njerëz i shkulnin tepër vetullat dhe më pas zbuluan se folikulat e tyre thjesht ndaluan së prodhuari qime.

“Ata nuk po merrnin dy qime për çdo një që shkulnin,” thotë ai. “Në fakt po mbeteshin pa asnjë.”

Dëmtimi është problemi kryesor.

“Mund ta thyesh qimen kur e shkul, ose ta tërheqësh nga rrënja,” shpjegon Tobin.

“Ndonjëherë, kur sheh pika të vogla gjaku në lëkurë, kjo do të thotë se ke hequr të gjithë folikulën dhe ajo nuk do të rikuperohet më.”

A ka diçka që mund të bësh për të parandaluar shfaqjen e flokëve të thinjur?

Në pjesën më të madhe kjo varet nga gjenetika, thotë Tobin. Duke parë të afërmit e ngushtë mund të krijosh një ide se çfarë të pret. Megjithatë, stresi kronik, gjumi i dobët dhe mungesat ushqyese mund të përshpejtojnë disa aspekte të plakjes biologjike, përfshirë ndryshimet në flokë.

Megjithatë, flokët e thinjur nuk janë domosdoshmërisht diçka negative. Ato shpesh rriten po aq mirë sa flokët me pigment, dhe ndonjëherë edhe më mirë. Për shembull, burrat me mjekra me qime të bardha dhe të errëta shpesh vërejnë se qimet e bardha rriten më gjatë mes rruajtjeve.

“Duket se flokët e bardhë dhe të thinjur kanë një avantazh në shpejtësinë e rritjes,” thotë Tobin./PERISKOPI