Austria do ta ndihmojë Kosovën në mbrojtjen e mjedisit

Ministrja e mjedisit dhe Planifikimit Hapësinor, Albena Reshitaj, ka takuar ambasadorin e Austrisë në Kosovë, Gernot Pfandler.

Diplomati austriak është njoftuar nga ministrja Reshitaj, për prioritetet e saj në kuadër të projekteve të MMPH-së. Ministrja Reshitaj theksoi se fokus i saj është përmirësimi dhe mbrojtja e mjedisit në përgjithësi dhe cilësia e ajrit në veçanti.

Reshitaj përmendi edhe përmirësimin e shtretërve të lumenjve dhe ndërtimin e mirëmbajtjen e deponive legale të mbeturinave.

“Kemi përpiluar planet afatshkurta, afatmesme dhe afatgjate për përmirësimin e cilësisë së ajrit. Kemi ndërmarrë disa hapa konkret dhe po punohet në vazhdimësi për të pasur një mjedis sa më të pastër. Për çështjen e ajrit kemi marrë përgjegjësitë që na takojnë”, është shprehur Reshitaj.

Ministrja e njoftoi ambasadorin edhe për procedimin e Ligjit për trajtimin e ndërtimeve pa leje në Kuvendit e Kosovës.

Pfandler shprehu gatishmërinë e shtetit austriak për ta ndihmuar këtë ministri.

Ambasadori u shpreh i gatshëm po ashtu që të ofrojë ekspertë austriak në mbikëqyrjen e projekteve që kanë të bëjnë me mjedisin dhe mundësinë që stafi profesional i ministrisë të ndjekë trajnime në fusha të ndryshme në Austri. /Periskopi/