Wilderit nuk i intereson përballja me Joshuan, ka një porosi

Boksieri amerikan Deontay Wilder ka hedhur poshtë akuzat e Eddie Hearn, menaxherit të Anthony Joshuas, sipas së cilit amerikani përdor emrin e rivalit britanik për të fituar më shumë popullaritet dhe shitur sa më shumë PPV (pay per view-paguaj për ta parë).

Edhe pse të gjithë shprehen se duan të shohin një duel të madh të peshës së rëndë mes Joshuas e Wilderit, ky i fundit ka deklaruar se nuk është aspak i interesuar për këtë përballje në rast se nuk paguhet sa duhet.

“Unë nuk jam fokusuar te Joshua dhe te ajo që thotë ai apo njerëzit e tij. Unë nuk kam nevojë për emrin e tij për të bërë famë, unë jam një boksier i madh pasi i mposht të gjithë”, tha Wilder.

“Nuk më intereson emri i tij, pasi statuset e mia janë fitoret e mia në ring”, shtoi ai.

Wilder mes tjerash tha se është fokusuar te dueli ndaj Tyson Fury, me të cilin do të përballet më 1 dhjetor, në stadiumin “Staples Center” të Los Anxhelosit, ku dhe do të mbrojë titullin kampion të kategorisë WBC./Periskopi/