Skocia me 9 mungesa ndaj Shqipërisë, tifozët kërkojnë të luhet ndeshja 5 – 5

Dëmtimet janë kthyer në një makth për Skocinë. Së fundmi kundërshtari i Shqipërisë në Ligën e Kombeve ka humbur edhe qendërmbrojtësin Kieran Tierni, i cili është larguar nga grumbullimi pak orë më parë, teksa nuk do të jetë i gatshëm ndaj kuqezinjve në “Loro Boriçi”. 21-vjeçarit aktivizohet me Sëlltik, teksa numëron 12 paraqitje me kombëtaren skoceze.

Lajmin për largimin e mbrojtësit e ka bërë publike vetë Federata Skoceze e Futbollit nëpërmjet një njoftimi në faqen zyrtare. Numri i të dëmtuarve në radhët e skocezëve ka shkuar në 9, teksa 6 futbollistë që luajtën si titullarë në takimin e parë, nuk do të jenë.

Nuk kanë munguar komentet ironizuese në faqen e Federatës Skoceze ku më pikantet ishin: “As nga qeveria e Tereza Mei nuk ka pasur kaq largime”. “Unë propozoj t’i kërkojmë Shqipërisë të luajmë pesëshe”. “Para se të më kërkoni, po ju them që jam i dëmtuar edhe unë”, shkruanin tifozët skocezë.