A do tërhiqet nga politika Netanyahu

Kryeministri izraelit Benjamin Netanyahu tha sot se nuk do të tërhiqej nga politika nëse do të falej nga presidenti i vendit në gjyqin për korrupsion me të cilin përballet prej vitesh.

I pyetur nga një gazetar nëse planifikonte të tërhiqej nga jeta politike nëse do t’i jepej një falje presidenciale, Netanyahu u përgjigj: “Jo”.

“Ata janë shumë të shqetësuar për të ardhmen time. Ata duan të sigurohen që, si ta shpreh? Janë të shqetësuar për të ardhmen time”, tha Netanyahu me shaka së bashku me kancelarin gjerman Friedrich Merz kur u pyet gjatë intervistës së tyre të përbashkët.

“Epo, edhe votuesit janë të tillë dhe ata do të vendosin, natyrisht, por ne kemi detyra të mëdha për të bërë”, shtoi kryeministri izraelit.

Ideja u hodh javën e kaluar kur ai i kërkoi zyrtarisht Presidentit Isaac Herzog falje presidenciale, raportoi Times of Israel.

Netanyahu përballet me një akuzë për ryshfet dhe tre akuza për mashtrim dhe shkelje të besimit, në tre raste. Akuzat lidhen me manipulim të shtypit dhe pranim të dhuratave të paligjshme në këmbim të favoreve qeveritare.

Ai mohon çdo shkelje dhe thotë se akuzat janë të sajuara si pjesë e një përpjekjeje për grusht shteti politik nga policia dhe prokurorët.

Akuzat u ngritën në nëntor të vitit 2019 dhe gjyqi i tij filloi në maj të 2020-ës pas vitesh hetimesh. Gjatë gjithë procesit, opozita ka bërë thirrje që ai të japë dorëheqjen për shkak të akuzave. Analistët vlerësojnë se nëse vazhdon, gjyqi mund të zvarritet për disa vite të tjera.

Herzog, i cili ka të ngjarë të marrë javë ose edhe muaj për të vendosur nëse do të japë faljen, tha javën e kaluar se do të merrte në konsideratë “vetëm të mirën e vendit” në vendimin e tij./Periskopi/