Aktakuzë për vrasje në tentativë ndaj të miturës në Vushtrri

Prokuroria Themelore në Mitrovicë ka ngritur aktakuzë në Gjykata Themelore në Mitrovicë ndaj të pandehurit me iniciale Sh.B., për veprat penale “Vrasja e rëndë në tentativë”, “Mbajtja në pronësi, kontroll ose posedim të paautorizuar të armëve” dhe “Asgjësimi apo dëmtimi i pasurisë”.

Sipas komunikatës, i pandehuri dyshohet se më 27 nëntor 2025, në Vushtrri, në oborrin e shtëpisë së tij ka tentuar me dashje t’i privojë nga jeta të dëmtuarën e mitur E.V. dhe M.V.

Prokuroria pretendon se, sapo të dëmtuarit kanë hyrë në oborr, i pandehuri ka shtënë me pushkë gjysmë automatike në drejtim të tyre, me ç’rast e mitura E.V. ka mbetur e plagosur në regjionin e shpatullës së majtë.

Aktakuza e ngarkon të pandehurin edhe për mbajtje të paautorizuar të armës, pasi nga një datë e pacaktuar deri më 27 nëntor 2025 ai kishte mbajtur në shtëpi pushkën gjysmë automatike, në kundërshtim me Ligjin për armët në Republikën e Kosovës. Arma dhe dhjetë fishekë janë konfiskuar nga policia.

Si pasojë e të shtënave, predhat kanë goditur edhe një automjet në pronësi të I.B., si dhe një dritare në banesën e L.Sh., duke shkaktuar dëme materiale.