Befason AAK, kandidat për kryetar të Prishtinës është Daut Haradinaj
Ramush Haradinaj nga AAK ka njoftuar zyrtarisht se kandidat për kryetar të Prishtinës nga partia e tij do të jetë Daut Haradinaj, transmeton Periskopi.
Pra kjo po del arsyeja e vërtetë pse Daut Haradinaj u dorëhoq nga mandati i deputetit.
Ja njoftimi i plotë:
Pas konsultimeve të vazhdueshme, me kënaqësi ju njoftoj për kandidaturën e Aleancës për kryeqytetin.
Për Kryetar të Prishtinës, kandidat nga AAK do të jetë z. Daut Haradinaj. Ai është njëri nga protagonistët kryesorë të luftës për liri dhe shtetndërtimit, udhëheqës në UÇK dhe TMK, deputet i zgjedhur dhe i dyti më i votuar nga radhët e Aleancës, ish shef i Grupit Parlamentar dhe jurist me profesion.
Me këtë Aleanca e konfirmon respektin për kryeqytetin, të cilin e bëri me ligj, ia ktheu Pallatin e Rinisë, e përkrahu me buxhet e projekte të shumta zhvillimore.
Aleanca konfirmon po ashtu, respektin për qytetarin dhe qeverisjen komunale, si dhe vendosmërinë për të fituar.
Qeverisja në nivel komunal, është veprimi më i afërt për të përmirësuar jetën e qytetarëve.
RH
