Bilall Sherifi: Po rrënohet një mur ilegal, po ndërtohet një tjetër
Sherifi ka thënë se këtu fshihen interpretime të ndryshme, meqenësë Qeveria tregon vetëm pjesën e marrëveshjes për rrënimin e këtij muri, por jo edhe pjesën tjetër për ndërtimin e një të riu, të cilën gjë e deklaroi kryetari I Komunës Veriore të Mitrovicës, Goran Rakiq, shkruan Periskopi.
Komenti i plotë i Sherifit:
Rrënim apo zëvendësim i MURIT Ilegal me një MUR Legal?
Si zakonisht, kur janë në pyetje marrëveshjet me Serbinë, sërish kemi dy interpretime kundërthënëse me njëra tjetrën. Përderisa bartësit e institucioneve qëndrore të Kosovës thonë se është arritur marrëveshja për rrënimin e murit, kryetari i Komunës Veriore të qytetit të Mitrovicës Goran Rakiq thotë se marrëveshja në fakt parasheh jo vetëm rrënimin e murit aktual por njëkohësisht edhe ndërtimin e një tjetri, vetëm se ky nuk do të jetë më ilegal dhe 2 metra i lartë por legal dhe me një lartësi prej vetëm 1.20 metra, si dhe do të vendoset disa metra më brenda zonës së këmbësorëve në sheshin e qytetit. Kjo është ajo që thotë Goran Rakiq.
Tash, nëse në marrëveshje nuk ka diçka tjetër e cila nuk është bërë ende publike, atëherë del se kjo marrëveshje më shumë është arritur për t’ua shpëtuar “fytyrën” drejtuesve të institucioneve, (nëse u ka mbetur ende), të cilët me deklarata të forta kundër murit kishin rritur shumë pritjet e qytetarëve, se sa për të hequr njëherë e përgjithmonë murin edhe si mjet edhe si koncept të cilin Serbia është duke e përdorur në funksion të ndarjes së veriut të Kosovës!
Ditëve në vazhdim do të shihet se cili nga dy interpretimet e marrëveshjes do të gjej zbatim. Gjithashtu, ditëve në vazhdim do të shohim se a bëhet fjalë për një marrëveshje për rrënim të murit apo për një marrëveshje përmes së cilës vetëm bëhet zëvendësimi i murit Ilegal me një mur Legal. Dhe, me këtë edhe nënshtrimi përfundimtar para politikës së mureve!
