Griezmann parashikon El Classico-n

Interesimi për derbin më të madh të futbollit evropian ndërmjet Barcelonës dhe Real Madridit është shumë i madh, ndërsa nuk mungojnë as parashikimet për epilogun e tij.

Barcelona mund ta fitojë “El Clasico” edhe pa Lionel Messin, sipas yllit të Atletico Madridit, Antoine Griezmann. Messi do të jetë në rolin e spektatorit gjatë supersfidës së të dielës në “Camp Nou”, pasi ka pësuar frakturë në krah, gjatë fitores 4-2 të fundjavës së kaluar në Sevilla. Ky dëmtim do ta mbajë argjentinasin deri në tri javë jashtë fushave të blerta.

Real Madridi ka një vend zhgënjyes (i shtatë) në renditjen aktuale të La Ligas, katër pikë prapa liderëve të Barçës dhe Espanyol.

Në këtë situatë ka spekulime se trajneri Julen Lopetegui do të shkarkohet, pavarësisht nga rezultati në “El Clasico” e nesërme. Fillimi i dobët sezonal i të bardhëve vjen pas largimit të Cristiano Ronaldos drejt Juventusit, ndërsa klubi nuk bëri asnjë lëvizje për ta zëvendësuar portugezin.

Megjithatë, edhe pa fituesit e 10 “Topave të Artë” në dekadën e fundit, përplasja mes Barcelonës dhe Real Madridit pritet me shumë interes.

Griezmann, i cili konfirmoi vendimin e tij për të qëndruar tek Atletico Madrid, pavarësisht interesit të Barçës, pret një ndeshje të fortë.

“Do të jetë një lojë e bukur, si të gjithë “El Clasico”, tha francezi për ESPN. “Është fatkeqësi, që Messi nuk do të luajë dot me Barcelonën, por katalanasit i kanë lojtarët për të fituar. Real Madridi ka nevojë për një fitore, që të lëvizë përpara. Do të jetë vërtet e bukur për ta parë këtë ndeshje”, ka shtuar sulmuesi francez.