Isaksen i ‘shuan’ ëndrrat e Milanit për Scudetto

Ëndrra e Milanit për titull u shua shpejt, pasi Lazio fitoi 1-0 falë golit të Gustav Isaksen, ndërsa Rafael Leao reagoi me zemërim pas zëvendësimit.

Pas fitores në “Derby della Madonnina” dhe barazimit të Interit me Atalantën, Milani kishte mundësi të afrohej në garën për titull.

Në mesfushë luajti Ardon Jashari për shkak të mungesave, ndërsa Lazio u mbështet edhe nga rikthimi i tifozëve në “Stadio Olimpico”.

Ndeshja pati raste për të dyja skuadrat, por momenti vendimtar erdhi kur Isaksen përfitoi nga një top i gjatë i Adam Marusic dhe shënoi për Lazion duke mposhtur Mike Maignan, në pjesën e parë.

Milani tentoi të reagojë në pjesën e dytë me disa raste dhe goditje drejt portës, por nuk arriti të barazojë.

Në fund, Lazio ruajti avantazhin dhe mori një fitore të rëndësishme që i dha goditje shpresave të Milanit për Scudetto.

Milani tanimë mbetet tetë pikë prapa Interit në garën për titull, me “Rossonerët” që kanë 60 pikë, derisa Interi ka 68 sosh.