Ish-presidenti i Barcelonës: Kush është Carvajal për t’i dhënë leksion Yamalit?

Ish-presidenti i Barcelonës, Joan Gaspart, e ka kritikuar ashpër mbrojtësin e Real Madridit, Dani Carvajal, për grindjen e tij me Lamine Yamal të Barcelonës pas El Clasicos.

“Kush është Carvajal që t’i japë leksion? Ai ishte një lojtar i shkëlqyer, por koha e tij ka kaluar. Pse duhet ta telefonojë Lamine për t’i kërkuar falje nëse fjalët e tij nuk i drejtoheshin as Carvajal?”, tha Gaspart.

Ai gjithashtu i kërkoi Barcës të kujdeset për gjendjen fizike të Yamal dhe e këshilloi spanjollin të rikthehet në formën e tij më të mirë.

Ish-shefi i Barcës shtoi: “Nëse Lamine nuk është në 100 për qind formën e tij më të mirë, ai duhet të pushojë dhe të rikuperohet. Ai duhet të luajë vetëm kur të jetë plotësisht në formë. Nuk duhet të ketë justifikime.

“Është e qartë se ai duhet të kujdeset, por Barça është mbi të. Ka një bazë tifozësh që e do shumë dhe ai nuk mund t’i zhgënjejë. Ai duhet ta fitojë përsëri atë mbështetje dhe të kuptojë se njerëzit e dinë se edhe pse është 18 vjeç, ai fiton si dikush që është 30 vjeç”, përfundoi ai.