Ja si do të reagojnë sportistët serbë nëse ata kosovarë fitojnë medalje

Ministri serb i Sportit dhe Rinisë, Vanja Udovçiq, ka deklaruar se sportistët e shtetit të tij që po garojnë në Lojërat Olimpike në Rio de Janeiro, janë rekomanduar nga pushteti që t’i braktisin podiumet fituese të medaljeve, nëse u bije që fitues në të njëjtën garë të jenë edhe sportistët nga Kosova.

Sipas këtij ministri serb, garuesit e këtij shteti fqinjë do të garojnë me ata të Kosovës, nëse një gjë e tillë ndodhë. Kjo, sipas Udovçiq, është bërë për të mos e prishur pozitën e tyre në Komitetin Olimpik Botëror dhe në këtë Olimpiadë, transmeton lajmi.net.

Por, sipas tij, nëse ndodhë që në shkallët e fituesve të ndonjë gare, ndodhën dy garues nga Kosova dhe Serbia, ai ka thënë se këta të fundit do ta lirojnë podiumin, për të mos e dëgjuar himnin e flamurit të Kosovës.

“Nuk do të ketë takim, dhe as ndonjë përballje mes sportistëve tanë dhe atyre nga Kosova”, ka thënë Udovçiq, duke shtuar se vendosja e sportistëve serbë dhe atyre kosovarë në fshatin olimpik, bënë që ata të mos takohen mes vete, transmeton lajmi.net.

Takimi i parë mes sportistëve kosovarë dhe atyre serbë, do të mund të ndodhë sot mes qitëseve. Bëhet fjalë për Urata Ramën nga Kosova dhe Andera Arsoviq e Ivana Maksimoviq nga Serbia./lajmi.net