Jashari nderohet me Këpucën e Artë për vitin 2025 në Belgjikë

Pas një viti të mrekullueshëm te Club Brugge ku edhe kompletoi kalimin te Milani, mesfushori shqiptar Ardon Jashari e ka fituar edhe “Këpucën e Artë” në Belgjikë që i jepet lojtarit më të mirë të vitit.

Jashari mposhti ish-bashkëlojtarët e tij, Christos Tzolis dhe Hans Vanaken, të cilët konsideroheshin favoritët kryesorë para nisjes së votimit.

Ky çmim është i veçantë, pasi Jashari arriti të grumbullojë pikë vetëm në një raund votimi.

Transferimi i tij veror te Milani e bëri të pamundur marrjen e votave të mëtejshme, por paraqitjet e tij në gjysmën e parë të vitit 2025 rezultuan vendimtare.

Pas atij lëndimi serioz, ky trofe ka një domethënie edhe më të madhe për Jasharin.

“Është një ndjenjë e pabesueshme. Për mua është një nder i madh ta fitoj këtë trofe. Pas gjashtë muajve të fundit, me lëndime dhe momente të vështira, kjo do të thotë jashtëzakonisht shumë. Kam kaluar një periudhë të mrekullueshme në Belgjikë. Kur e shoh pas, nuk do ta harroj kurrë Belgjikën. Ajo është bërë vërtet një shtëpi e dytë për mua”.

Futbollisti që përfaqëson Zvicrën udhëtoi posaçërisht për të marrë çmimin.

Pas një ndeshjeje kundër Fiorentinës, ai hipi menjëherë në avion drejt Ostendës.

“Pata 15 minuta kohë pas ndeshjes. Këtu pata pesë minuta pushim dhe më pas dola direkt në skenë”.

Takimi me ish-bashkëlojtarët e tij e preku dukshëm Jasharin, shkruan tch.

Ai foli për një pritje shumë të ngrohtë dhe theksoi respektin dhe vlerësimin që ende ndjen për lojtarët dhe stafin e Club Brugge.

“Sapo të kem pak kohë, dua të bëj një festë të vogël atje. Jam rritur si lojtar dhe si njeri. Ky trofe, ky vend dhe ky klub e bëjnë historinë time edhe më të veçantë”, nënvizoi ai.