Këto sëmundje konsideroheshin të pashërueshme, tani përmes inteligjencës artificiale gjithçka po ndryshon për mirë

Inteligjenca artificiale po hap një epokë të re në zhvillimin e barnave, duke ndihmuar shkencëtarët të gjejnë trajtime për sëmundje të vështira si sëmundja e Parkinsonit, bakteret rezistente ndaj antibiotikëve dhe shumë sëmundje të rralla, shkruan BBC.

Studiuesit në Institutin e Teknologjisë në Masaçusets, të udhëhequr nga James Collins, përdorën inteligjencën artificiale për të analizuar më shumë se 45 milionë struktura kimike dhe zbuluan dy përbërje të reja që mund të luftojnë bakteret shumë rezistente si gonorrea dhe Stafilokoku aureus rezistent ndaj meticilinës (MRSA).

Inteligjenca artificiale po përdoret gjithashtu për të kërkuar trajtime për sëmundjen e Parkinsonit, një sëmundje neurologjike që prek mbi 10 milionë njerëz në botë dhe ende nuk ka një kurë që ndalon përparimin e saj. Shkencëtarët përdorin mësimin makinerik për të gjetur molekula që mund të ndalojnë dëmtimin e trurit.

Ndërkohë, disa studiues po përdorin inteligjencën artificiale për të gjetur përdorime të reja për ilaçet ekzistuese.

David Fajgenbaum nga Universiteti i Pensilvanisë arriti të trajtojë sëmundjen e tij të rrallë, sëmundjen Castleman, me ilaçin Sirolimus, i cili zakonisht përdoret për pacientët me transplant të veshkës.

Ekspertët besojnë se brenda 5–10 viteve të ardhshme, shumica e zhvillimit të barnave të reja mund të udhëhiqet nga inteligjenca artificiale, edhe pse procesi i plotë i krijimit të ilaçeve mbetet i gjatë dhe kërkon shumë testime.