“Korniza ligjore përfshin standardet ndërkombëtare”, Trendafilova i përgjigjet Kuvendit për Rezolutën

Dhomat e Specializuara në Hagë e kanë pranuar Rezolutën nr.10-R-001, të cilën Kuvendit i Kosovës e ka miratuar më 12 shkurt

Kryetarja e Kuvendit, Albulena Haxhiu, i ka njoftuar deputetët se sot ka marrë këtë konfirmim nga kryetarja e Dhomave të Specializuara të Kosovës, Ekaterina Trendafilova.

Në njoftimin që e ka parë gazeta Nacionale, Trendafilova ka dhënë ndonjë garanci se do të merret me shqetësimet që janë ngritur në rezolutë.

“Me këtë e pranoj marrjen e Rezolutës Nr. 10-R-001, të miratuar më 12 shkurt 2026, që ka të bëjë me procedurat gjyqësore para Dhoma të Specializuara. Korniza ligjore që rregullon Dhomat e Specializuara, ashtu siç është miratuar nga Kuvendi i Kosovës, përfshin standardet ndërkombëtare të njohura të gjykimit të drejtë dhe garancive të fuqishme të pavarësisë gjyqësore”, thuhet në njoftimin e Trandailoves për Haxhiun, duke u dhënë detaje tjera.

“Të gjitha personat që paraqiten para Dhomave të Specializuara, qoftë të dyshuar, të akuzuar apo viktima, mund të përfitojnë nga mjetet juridike të parashikuara brenda kësaj kornize ligjore, përfshirë dërgimin e çështjeve në Dhomën Speciale të Gjykatës Kushtetuese si autoriteti përfundimtar për interpretimin e Kushtetutës së Kosovës. Kjo e fundit, gjithashtu edhe panelet penale, kanë zbatuar vazhdimisht Kushtetutën e Kosovës dhe kanë ndjekur jurisprudencën e Gjykatës Evropiane për të Drejtat e Njeriut, duke siguruar kështu pajtueshmëri të plotë me parimet e vendosura të të drejtave ndërkombëtare të njeriut. Gjithashtu, dëshiroj ta shfrytëzoj këtë rast për t’ju shprehur urimet e mia të sinqerta për zgjedhjen tuaj të fundit si Kryetare e re e Kuvendit. Ky funksion i nderuar bart përgjegjësi të rëndësishme brenda kornizës kushtetuese të Kosovës, dhe ju uroj suksese në realizimin e mandatit tuaj të ri”, është thënë në njoftim.