Krasniqi hedh dyshime nëse zgjedhja e Rashiqit ishte e ligjshme
Albert Krasniqi nga organizata Demokraci Plus ka hedhur dyshime nëse procedura e zgjedhjes së Nenad Rashiqit nënkryetar i Kuvendit ishte e ligjshme.
“Kur përfundojnë tre raunde votimi për të gjithë kandidatët e propozuar nga shumica e deputetëve të komunitetit serb, procedura rinis për ditët e mbetura brenda afatit 30-ditor për konstituimin e Kuvendit. Në këtë rast, shumica e deputetëve të komunitetit serb nuk e kanë refuzuar të drejtën për të propozuar kandidatin, prandaj mekanizmi i “shortit” nuk ka mundur të aktivizohet”, ka shkruar ai në Facebook.
Krasniqi tha se ajo që ka ndodhur sot në praktikë është se kandidati për nënkryetar nuk është propozuar nga shumica e deputetëve të komunitetit serb, siç parashihet, por nga deputetët e shumicës.
Me 71 vota pro, deputetët e Kuvendit të Kosovës e zgjodhën Nenad Rashiqin nënkryetar të Kuvendit nga komuniteti serb, pasi të nëntë deputetët e Listës Serbe nuk i siguruan votat e nevojshme.
Kryeparlamentari Dimal Basha e shpalli Kuvendin të konstituuar dhe tha se procedura e zgjedhjes së Rashiqit ishte e rregullt.
