Ligji i ri: Meta fillon t’i heqë fëmijët australianë nga Instagram dhe Facebook

Meta ka filluar t’i heqë fëmijët australianë nën moshën 16 vjeç nga platformat e saj Instagram, Facebook dhe Threads, një javë para se të nisë zyrtarisht ndalimi i rrjeteve sociale për adoleshentët.

Gjiganti i teknologjisë njoftoi muajin e kaluar se ka filluar t’u dërgonte njoftime përdoruesve të moshës 13 deri në 15 vjeç se llogaritë e tyre do të fillonin të mbylleshin nga data 4 dhjetor.

Vlerësohet se rreth 150,000 përdorues të Facebook dhe 350,000 llogari të Instagram pritet të preken. Threads, i ngjashëm me X, mund të jetë i qasshëm vetëm përmes një llogarie Instagram.

Ndalimi i parë në botë i rrjeteve sociale në Australi fillon më 10 dhjetor, me kompanitë që përballen me gjoba deri në 49.5 milionë dollarë australianë (33 milionë dollarë amerikanë, 25 milionë paund) nëse nuk marrin “masa të arsyeshme” për t’i ndaluar nën-16-vjeçarët të kenë llogari.

Një zëdhënëse e Metës i tha BBC-së të enjten se “respektimi i ligjit do të jetë një proces i vazhdueshëm dhe me shumë shtresa”.

“Ndërsa Meta është e përkushtuar ta respektojë ligjin, ne besojmë se nevojitet një qasje më efektive, e standardizuar dhe që ruan privatësinë”, tha ajo.

Qeveria duhet të kërkojë që dyqanet e aplikacioneve ta verifikojnë moshën e përdoruesve kur ata shkarkojnë aplikacione dhe të kërkohet aprovimi prindëror për nën-16-vjeçarët, tha Meta, pasi kjo do ta eliminonte nevojën që adoleshentët ta verifikojnë moshën e tyre në aplikacione të ndryshme.

Muajin e kaluar, Meta tha se përdoruesit që i kishte identifikuar si nën 16 vjeç do të mund ta shkarkonin dhe t’i ruanin postimet, videot dhe mesazhet e tyre para se llogaritë e tyre të çaktivizoheshin.

Adoleshentët që besojnë se janë kategorizuar gabimisht si nën 16 vjeç mund të kërkojnë një rishikim dhe të dërgojnë një “video selfie” për ta verifikuar moshën e tyre. Ata gjithashtu mund të ofrojnë një patentë shoferi ose një dokument identifikimi të lëshuar nga qeveria.