Ceremonia nisi me interpretimin e këngës “Amazing Grace” nga një grup gajdexhinjsh, duke krijuar një atmosferë solemne dhe respekti, përcjell Periskopi.

Presidenti Donald Trump dhe anëtarë të kabinetit të tij do të mbajnë fjalime gjatë ceremonisë, duke nxitur masa të rrepta sigurie për shkak të prezencës së figurave të larta politike dhe tensioneve të fundit.

Erika Kirk, e veja e aktivistit të ndjerë dhe tani drejtuese e organizatës Turning Point USA, do të marrë fjalën për të shprehur pikëllimin dhe përkushtimin për të vazhduar misionin e bashkëshortit të saj.

Ndër të pranishmit ishte edhe Elon Musk, CEO i Teslës dhe ish-zyrtar i administratës Trump, i cili u përshëndet me entuziazëm nga turma dhe postoi një video nga stadiumi në rrjetin social X, duke shkruar: “Çdo vend në këtë arenë gjigante që nuk është i rrethuar me litarë për siguri është i mbushur deri në tavan. I nderuar që jam këtu. Gjithçka për Charlie Kirk.”

Pjesëmarrësit mbanin pankarta në ngjyrat e kuqe, të bardha dhe blu, me mbishkrime si “Kjo është pika jonë e kthesës”, duke reflektuar rëndësinë e ceremonisë për komunitetin konservator.

Podiumi, i rrethuar me xhama balistikë, është vendosur në qendër të stadiumit për të siguruar masat maksimale të sigurisë, një praktikë standarde pas atentatit ndaj Presidentit Trump vitin e kaluar në Pensilvani.