Ronaldo nuk do të pensionohet deri të arrijë shifrën e 1 mijë golave

Kapiteni i Portugalisë, Cristiano Ronaldo, thotë se nuk do ta përfundojë karrierën e tij si futbollist derisa të shënojë golin e 1.000-të në karrierë.

40-vjeçari realizoi dy gola në fitoren 3-0 të Al-Nassr ndaj Al Akhdoud të shtunën, duke e çuar numrin e përgjithshëm të golave për klub dhe kombëtare në 956.

Sulmuesi, i cili iu bashkua Al-Nassr në vitin 2022, nënshkroi verën e kaluar një kontratë të re dyvjeçare me klubin saudit, që e mban atë aktiv përtej ditëlindjes së tij të 42-të.

Duke folur pasi u shpall Lojtari më i Mirë i Lindjes së Mesme në ceremoninë Globe Soccer Awards në Dubai të dielën, Ronaldo u shpreh:
“Është e vështirë të vazhdosh të luash, por jam i motivuar.

Pasioni im është i lartë dhe dua të vazhdoj. Nuk ka rëndësi se ku luaj, qoftë në Lindjen e Mesme apo në Evropë. Unë gjithmonë e shijoj futbollin dhe dua të vazhdoj.

Ju e dini cili është qëllimi im. Dua të fitoj trofe dhe dua të arrij atë numër [1.000 gola] që të gjithë e dini. Do ta arrij atë numër me siguri, nëse nuk kam lëndime.”

Në një intervistë me Piers Morgan muajin e kaluar, Ronaldo kishte thënë se planifikon të tërhiqet nga futbolli “së shpejti”.

“Mendoj se do të jem i përgatitur. Do të jetë e vështirë, sigurisht. Me shumë gjasë do të qaj,” kishte thënë Ronaldo.

Ronaldo ka shënuar 13 gola në 14 paraqitje këtë sezon për Al-Nassr, që kryeson tabelën e Saudi Pro League me katër pikë diferencë.

Pavarësisht rekordit të tij prej 112 golash në 125 ndeshje, Al-Nassr ka fituar vetëm një trofe që nga ardhja e tij – Kupën e Kampionëve të Klubeve Arabe në vitin 2023.

Ronaldo mban rekordin për më së shumti gola me Portugalinë (143) dhe Real Madridin (450), dhe është lojtari i vetëm që ka shënuar mbi 100 gola për katër klube: Manchester United, Real Madrid, Juventus dhe Al-Nassr.

Sulmuesi deklaroi në nëntor se Kupa e Botës 2026, që do të zhvillohet në Shtetet e Bashkuara të Amerikës, Kanada dhe Meksikë, do të jetë turneu i tij i fundit ndërkombëtar.

Ai e udhëhoqi Portugalinë si kapiten drejt triumfit në Euro 2016 në Francë – trofeu i parë ndërkombëtar për kombëtaren portugeze të meshkujve.