Rrahmani: Nuk dorëzohemi përballë Kroacisë

Amir Rrahmani e ka dhënë një intervistë për të përditshmen kroate “Vecernji”, në versionin e saj online, ku ka folur për eksperiencën e tij në Dinamo Zagreb, e mbi të gjitha për ndeshjen ndërmjet Kroacisë dhe Kosovës, e cila do të zhvillohet më 2 shtator në stadiumin Maksimir të Zagrebit, e vlefshme për kualifikimet e Botërorit 2018.

“Do të jetë e vështirë për ne në Maksimir, e dimë se Kroacia ka lojtarë më të mirë”, ka thënë fillimisht Rrahmani.

Kosova ka humbur 0:6 në ndeshjen e parë me kroatët në Shkodër, ndërsa të vetmen pikë që e ka marrë ishte ajo në udhëtim, ndaj Finlandës.

“Shikoni, ne luajmë për vetveten, duam të rritemi në renditje me rezultate më të mira, që ta përmirësojmë statusin, nëse duam të kemi kundërshtarë më të dobët në kualifikimet e ardhshme”, ka shtuar qendërmbrojtësi kosovar.