Skandali zgjedhor në Prizren: Djali i Nait Hasanit i arrestuar, mijëra vota dyshohet se u vodhën nga një kandidat te tjetri – Ja sa mund të dënohen

Ajo që po zbulohet në Prizren nuk është më thjesht shkelje zgjedhore, por një skemë e organizuar që ka goditur rëndë demokracinë. Rreth 100 zyrtarë janë shoqëruar në Polici për dyshime serioze për manipulim të votave. Hetimet e fundit nga Prokuroria e Prizrenit, hedhin dritë mbi një fenomen skandaloz: transferim, për të mos thënë ende “vjedhje” masive votash nga një kandidat te tjetri, duke e kthyer procesin në një skandal zgjedhor, shkruan Periskopi.

Në këtë kontekst, sipas lajmeve të fundit, Fetah Paçarizi dhe Nait Hasani rezultojnë të jenë kandidatët kampion që mbajnë “rekordin” për humbje votash – një fakt që ngre dyshime të rënda mbi atë se çfarë ka ndodhur realisht në kutitë e votimit. Madje, nga raportimet në media, djali i Nait Hasanit, Art Hasani, dyshohet se është në mesin e të arrestuarve në aksionin e gjerë të Prokurorisë Themelore në Prizren kundër keqpërdorimit të votave.

Ky “rekord” nuk është statistikë e zakonshme zgjedhore, por sinjal alarmi për manipulim brutal, që sipas dyshimeve, është realizuar përmes njerëzve të vendosur brenda vetë mekanizmit zgjedhor: komisionerë, zyrtarë dhe përgjegjës të procesit të numërimit.

Ndërkohë, emra të lidhur drejtpërdrejt me këtë skandal po dalin gjithnjë e më shpesh në sfond, duke e forcuar bindjen se vjedhja e votës nuk ka qenë “aksident”, por strategji.

Në një pronocim për Periskopin, avokati Ardian Bajraktari, ka treguar se çka parasheh ligji kur kemi të bëjmë me elemente të veprës penale “falsifikim i rezultatit zgjedhor”.

“Me aq sa kemi parë, kemi të bëjmë me elemente të veprës penale të falsifikimit të rezultatit zgjedhor të përcaktuar me nenin 216 të Kodit Penal. E, kur kjo vepër kryhet nga persona që veprojnë në kapacitete zyrtare, sic janë anëtarët e komisioneve zgjedhore, atëherë shkalla e ndëshkueshmërisë mund të shkojë deri në pesë (5) vite. Mirëpo, mendoj se procesi hetimor duhet të shkojë përtej antarëve sepse jam i bindur se duhet të përfshihen edhe persona të tjerë. Sepse, kjo në instancën e fundit është tentativë për me deviju vullnetin e qytetarëve në zgjedhje. Prandaj, është përgjegjësi e organeve të ligjit që gjithë ata persona që kanë tentu me deviju vullnetin e qytetarëve t’i vendosin para drejtësisë, në mënyrë që kjo të jetë një mesazh i qartë për të gjithë ata që të ruhet procesi zgjedhor dhe qytetarët të kenë besim se vota e tyre shkon aty ku e vlerësojnë dhe e hedhin dhe asessi të mos ketë mundësi që ajo të shkojë diku tjetër ku për arsye të ndryshme mund të vendosin një kategori e caktuar në një vend”, tha Bajraktari për Periskopin.

Aksioni për arrestimin e hajnave të votave, flasin nga Prokuroria Themelore e Prizrenit